Кртола

Кртола, грутка или тубер (лат. tuber) е видоизменето стебло или корен кај некои растенија, врз основа на што и се разликуваат стеблени и коренови кртоли.

Стеблените кртоли настануваат со интензивно примарно или секундарно задебелување на хипокотилот (вистински стеблени кртоли), или се развиваат од еден или повеќе изданоци од интернодиумите. Првична функција на грутките е складирање на резервни материи (особено скроб), преживување на неповолните услови на средината и размножување.

Вистинските стеблени грутки се развиваат кај некои едногодишни (циклама) и двегодишни растенија (ротквица, цвекло). Кртолата што настанува од интернодиумите на стеблото може да се забележи кај келерабата.

Кртолите на компирот настануваат на краевите од плагиотропните подземни интернодиуми (столони), а служат за складирање на скроб и за размножување.

Кореновите кртоли настануваат со задебелување на страничните корења и ги задржуваат нивните анатомски одлики (присуство на коренова капа, отсуство на лисни зачетоци).