Urang Korowai

Korowai
Kosenirowai, Kolufo

Total populasi
2,900[rujuakan?]
Kawasan jo populasi nan signifikan
Indonesia Papua Selatan: Kabupaten Boven Digoel • Kabupaten Mappi • Kabupaten Asmat Papua Pegunungan: Kabupaten Yahukimo
Bahaso
Korowai, Bahaso Indonesia
Agamo
Kristen, Animisme, Dinamisme, Totemisme
Kalompok etnis takaik
Kombai, Korfa, Korfey, Awyu

Urang Korowai atau Koroway adolah suku nan baru barinteraksi jo dunia lua sakitar 30 tahun nan lalu di padalaman Papua Pegunungan jo Papua Selatan, Indonesia.^[1] Urang Korowai ko bapopulasi sakitar 3.000 urang. Urang iko hiduik di rumah nan dibangun di ateh batang kayu nan dinamoan jo Rumah Tinggi.^[2] Babarapo rumah urang Korowai ko bahkan dapek mancapai katinggian sampai 50 meter dari pamukaan tanah. Urang Korowai adolah salah satu suku di daratan Papua nan indak manggunoan koteka. Sampai tahun 1970, masyarakaik Korowai iko indak mangatahui kabaradoan satiok urang salain kalompok inyo surang.^[3]

Urang Korowai disabuik jo jo namo Klufo Fyumanop. Klufo aratinyo urang, sadangkan Fyumanop aratinyo jalan di aeh tulang kaki. Klufo Fyumanop diaratian sabagai urang nan biaso bajalan kaki. Mereka manamoan iko untuak mambedaan identitias dirinyo dari urang Citak Mitak nan manggunoan parahu sabagai alaik transportasi utamonyo. Manuruik Lekitoo dalam bukunyo di tahun 2012 namo Korowai nan sabananyo barasa dari urang Balando. Badasarkan sajumlah sumber bahwasanyo urang Balando labiah murah manyabuik kato Klufo jo namo nan murah dikatoan yaitunyo Korowai.^[4]

Bahaso Korowai tamasuak dalam Rumpun bahaso Sungai Digul (Papua tenggara) atau dalam klasifikasi lamo disabuik Awyu-Dumut dan marupoan bagian dari filum Trans-Nugini. Sabuah tata bahaso jo kamus alah diproduksi dek ahli bahasa misionaris Balando.^[5]

Sarupo jo Suku Kombai, panduduak dari suku iko mambangun rumah di pohon nan mampunyoi tinggi 10 hinggo 30 meter. Tabuek dari kayu, rotan, bilah bambu jo kulik kayu, rumah Suku Korowai dibangun di ateh pohon untuak mancagah sarangan binatang bueh pado zaman dahulu atau bahkan sarangan dari suku lain. Untuak mancapai ka dalam rumah, mereka mambuek tangga nan tabuek dari sabatang kayu.^[4]

Urang Korowai mampunyoi pambagian tugas samo sarupo urang Kombai. Kaum laki-laki batugas manabang pohon jo pai ka hutan untuak baburu, mulai dari kus-kus, babi hutan hinggo buruang kasuari. Samantaro itu kaum padusi dari suku iko batugas mangasuah anak jo mancari sagu. Ciri khas dari kaum padusi suku iko adolah mereka biaso mamakai rok pendek nan bahannyo didapekan dari kayu jo serat sagu.^[6]

Mayoritas klan Korowai tingga di rumah pohon di wilayah nan taisolasi. Sajak tahun 1980 sabagian alah pindah ka desa-desa nan baru dibukak dari Yaniruma di tapi Sungai Becking (area Kombai-Korowai), Mu, jo Basman (daerah Korowai-Citak). Pado tahun 1987, wilayah padesaan dibukak di Manggél, di Yafufla (1988), Mabül di tapi Sungai Pulau (1989), jo di Khaiflambolüp (1998).^[7] Tingkek absensi desa masih tinggi, karano relatif panjang jarak antaro pamukiman jo sumber daya makanan (sagu).