Damam tifoid
 | Artikel ko maagiah informasi dasa tantang topik kasihatan. Informasi dalam artikel ko buliah digunoan anyo untuak panjalehan ilmiah, bukan untuak diagnosis diri dan indak dapek manggantian diagnosis medis. Paratian: Informasi dalam artikel ko bukanlah resep atau nasihaik medis. Wikipedia bukan pangganti dotor. Kok Sanak paralu bantuan atau ka barubek bakonsultasilah jo tanago kasihatan profesional. |
| Damam tifoid | |
|---|---|
| Namo lain | Tifoid, tipes |
 | |
| Rose spots pado dado urang nan takanai damam tifoid | |
| Spesialisasi | Panyakik mamindah |
| Gejala | Damam, sakik paruik, sakik kapalo, ruam merah[1] |
| Awitan | 6–30 ari sasudah tapapar[1][2] |
| Panyabab | Salmonella enterica subsp. enterica (tapindah dek makanan atau minuman nan takontaminasi jo feces)[3][4] |
| Faktor risiko | Sanitasi buruak, higienitas buruak[3] |
| Diagnosis | Kultur bakteri, deteksi DNA [2][3][5] |
| Kondisi sarupo | Panyakik mamindah lainnyo[6] |
| Panagahan | Vaksin tifoid, mancuci tangan[2][7] |
| Parawatan | Antibiotik[3] |
| Frekuensi | 12,5 juta (2015)[8] |
| Kamatian | 149.000 (2015)[9] |
Damam tifoid atau tifoid (dek urang awam acok basabuik tipes, bedakan jo tifus) adolah panyakik mamindah nan disababkan dek bakteri Salmonella enterica serovar typhi.[3] Bakteri ko anyo bakambang pado manusia, sainggo dapek bapindah malalui aia liua atau feses. Pado lingkuang nan kumuah, panyakik ko mudah bapindah utamonyo malalui makanan jo minuman nan indak barasiah. Basamo jo damam paratifoid, nan mampunyoi gejala nan sarupo, tifoid disabuik juo subagai damam enterik (damam usus).[3]
Gejala panyakik ko baragam dari nan ringan sampai nan barek. Bamulo muncua gejala pado ari ka-6 inggo ka-30 (rato-rato 7-14 ari) sasudah tapapar bakteri.[1][2] Nan paliang acok ditandoi jo damam tinggi tiok sanjo inggo malam dalam babarapo ari sarato samakin maningkek suhunyo dari ari ka ari. Kudian dapek disaratoi jo lamah badan, sakik paruik, sakik kapalo, jo mual muntah ringan. Bisa juo disaratoi parubahan pola buang aia gadang, sarupo kabobolan (konstipasi) pado urang gadang atau mancoro (diare; jarang, umumnyo pado anak).[2][6] Pado sabagian urang muncua ruam-ruam sirah cando sirahnyo bungo mawar (Rose spots).[2] Pado kasus nan parah, dapek tajadi paniang ataupun sakik kapalo barek inggo gangguan kasadaran.[6] Kok indak diubek, kondisi ko dapek batahan salamo bapakan-pakan inggo babulan-bulan. Samantaro kok diubek, dapek cegak dalam etongan ari inggo duo pakan.[2]
Panyabab
[suntiang | suntiang sumber]Tifoid disababkan dek bakeri Salmonella enterica serovar Typhi. Bakteri ko marupokan bakteri gram negatif, nan indak bakapsul. Bakteri ko dapek iduik pado suhu 37o C sarato pH 6-8. Di alam bebas, bakteri ko dapek batahan inggo bapakan-pakan. Samantaro tampek iduiknyo hanyo pado manusia, utamonyo di usus jo darah.[2][4]
Bakteri dapek taseba malalui makanan atau minuman nan takontasinasi jo feses urang nan tainfeksi tifoid. Faktor risikonyo adolah lingkuang jo sanitasi sarato higienitas nan buruak. Pado urang nan pai raun ka nagara-nagara bakambang juo barisiko.[4]
Bakteri Salmonella nan alah malalui lambuang dan tibo di usus aluih kudian mainvasi lapisan-lapisannyo inggo masuak ka plak Peyeri (jaringan limfoid). Bakteri bakambang biak di sinan dan taseba ka saluran limfe mesenterikus inggo ka duktus torasikus. Dari sinan, bakteri masuak ka pambuluah darah inggo ka organ-organ lain cando hepar, limpo, kanduang ampadu, jo usus.[4]
Bakteri Salmonella mahasiakan endotoksin nan marangsang paradangan pado organ-organ inggo mamanciang produksi sitokin dari sel-sel makrofag jo leukosit. Kasudahannyo muncual gejala-gejala cando damam. Pado usus, plak Peyeri samakin lamo samakin manggadang (hiperplasia) dalam sapakan partamo. Pado pakan kaduo plak Peyeri maaalami kamatian jaringan (nekrosis) dan pado pakan katigo tajadi palukoan. Palukoan pado plak Peyeri samakin lamo manggadang dan manjadi tukak inggo mambuek padarahan dalam paruik. Pado organ lain cando hepar, ukurannyo manggadang dek bakteri salmonella bakambang dalam jaringan retikoendotelialnyo. [4]
Epidemiologi
[suntiang | suntiang sumber]
Tifoid marupokan panyakik nan mudah bapindah pado lingkuang jo sanitasi sarato higienitas buruak, sainggo kasusnyo labiah tinggi di nagara-nagara bakambang. Manuruik laporan WHO pado taun 2018, dipakirokan ado 21 juta kasus sacaro global jo 222.000 kasus kamatian tiok taunnyo.[9] Di Asia Selatan jo Asia Tenggara manunjuakan paningkekan kasus (>100 kasus per 100.000 kasus), diikuti jo Afrika Selatan (10--100 kasus per 100.000 kasus).[3] Kondisi lingkuangan jo sanitasi nan samakin rancak mangurangi kasus tifoid di nagara-nagara maju, cando di Eropa Barat jo Amerika Utara.[4] Paningkekan kasus di nagara-nagara tasabuik umumnyo bajangkik pado urang nan baru pulang raun atau parantauan dari nagara-nagara bakambang.[10]
Pado maso pandemi SARS-CoV2 (2020), kasus damam tifoid baliak maningkek jo gejala klinik nan sarupo jo COVID-19. Di Pakistan dilaporkan ado 20.000 kasus tifoid pado Juni 2020.[11]
Tando jo gejala
[suntiang | suntiang sumber]Gambaran klinis pado pasien tifoid dapek baragam. Gejala nan paliang paliang acok muncua yaitu damam. Damam pado pandarito tifoid ditandoi jo suhu nan samakin lamo samakin maninggi sarato pabedaan suhu antaro pagi jo malamnyo. Suhu labiah tinggi pado malam ari daripado pagi arinyo. Damam paliang angek dirasokan pado pakan kaduo dan baransua puliah pado pakan katigo. Pado anak, damam nan tinggi dapek mambueknyo kajang. Salain damam diikuti pulo jo raso mamanek di badan, payah lalok (insomnia), ilang salero makan (anoreksia), inggo mual jo muntah. Damam pado tifoid kadang mambuek jantuang malambek untuak badabok, satiok tajadi paningkekan suhu jantung samakin malambek badabok.[6]
Pado saluran cerna dapek muncua baun muluik dek damam nan lamo. Bibia manjadi kariang jo pacah-pacah. Pado lidah, tampak kotor (mamutiah di bagian tangah) jo kasirahan di tapiannyo. Lidah ko disabuik sabagai coated tongue, typhoid tongue, atau white-appearance tongue. Pado paruik dirasokan raso mamadiah sarato kondisi kabobolan (konstipasi), kadang mancoro (diare).[6]
Pananganan
[suntiang | suntiang sumber]Tifoid dapek ditagah jo babarapo caro. Vaksin tifoid dapek managah 40 inggo 90% kasus salamo duo taun partamo[7] dan dapek maagiah dampak inggo tujuah taun lamonyo.[3] Pado urang barisiko tinggi atau nan pai raun ka daerah jo endemik kasus disarankan untuak vaksinasi.[4] Upayo lain nan paralu adolah panyadioan aia barasiah, sanitasi nan rancak, sarato mancuci tangan jo sabun.[2] Salamo urang nan takanai tifoid alun dinyatokan cegak, urang tasabuik indak buliah manyajikan makan untuak urang lain.[2]
Panyakik ko dapek diubek jo antibiotik cando azitromisin, flurokuinolon, atau sefalosporin generasi katigo.[3] Resistensi (kaindakmampanan) ka ubek-ubek ko dilaporkan alah mulai tajadi, nan mambuek upayo maubek samakin payah.[3][12]
Rujuakan
[suntiang | suntiang sumber]- ↑ a b c Newton, Anna E. (2014). "3 Infectious Diseases Related To Travel". CDC health information for international travel 2014 : the yellow book. ISBN 9780199948499. http://wwwnc.cdc.gov/travel/yellowbook/2014/chapter-3-infectious-diseases-related-to-travel/typhoid-and-paratyphoid-fever.
- ↑ a b c d e f g h i j "Typhoid Fever". cdc.gov. May 14, 2013. Diarsipkan dari versi asli tanggal 6 June 2016. Diakses tanggal 28 September 2020.
- ↑ a b c d e f g h i j Wain J, Hendriksen RS, Mikoleit ML, Keddy KH, Ochiai RL (March 2015). "Typhoid fever". Lancet. 385 (9973): 1136–45. doi:10.1016/s0140-6736(13)62708-7. PMID 25458731.
- ↑ a b c d e f g "Typhoid vaccines: WHO position paper" (PDF). Releve Epidemiologique Hebdomadaire. 83 (6): 49–59. February 2008. PMID 18260212. Diarsipkan dari versi asli (PDF) tanggal April 2, 2015.
- ↑ Crump JA, Mintz ED (January 2010). "Global trends in typhoid and paratyphoid Fever". Clinical Infectious Diseases. 50 (2): 241–6. doi:10.1086/649541. PMC 2798017
. PMID 20014951.
- ↑ a b c d e "Typhoid Fever". cdc.gov. May 14, 2013. Diarsipkan dari versi asli tanggal 2 April 2015. Diakses tanggal 28 September 2015.
- ↑ a b Milligan R, Paul M, Richardson M, Neuberger A (May 2018). "Vaccines for preventing typhoid fever". The Cochrane Database of Systematic Reviews. 5: CD001261. doi:10.1002/14651858.CD001261.pub4. PMC 6494485 . PMID 29851031.
- ↑ Vos T, Allen C, Arora M, Barber RM, Bhutta ZA, Brown A, et al. (GBD 2015 Disease and Injury Incidence and Prevalence Collaborators) (October 2016). "Global, regional, and national incidence, prevalence, and years lived with disability for 310 diseases and injuries, 1990-2015: a systematic analysis for the Global Burden of Disease Study 2015". Lancet. 388 (10053): 1545–1602. doi:10.1016/S0140-6736(16)31678-6. PMC 5055577 . PMID 27733282.
- ↑ a b Wang H, Naghavi M, Allen C, Barber RM, Bhutta ZA, Carter A, et al. (GBD 2015 Mortality and Causes of Death Collaborators) (October 2016). "Global, regional, and national life expectancy, all-cause mortality, and cause-specific mortality for 249 causes of death, 1980-2015: a systematic analysis for the Global Burden of Disease Study 2015". Lancet. 388 (10053): 1459–1544. doi:10.1016/s0140-6736(16)31012-1. PMC 5388903 . PMID 27733281.
- ↑ Muresu, N.; Sotgiu, G.; Are, B.M.; Cossu, A.; Cocuzza, C.; Martinelli, M.; Babudieri, S.; Are, R.; Dettori, M.; Azara, A.; Saderi, L.; Piana, A. Travel-Related Typhoid Fever: Narrative Review of the Scientific Literature. Int. J. Environ. Res. Public Health 2020, 17, 615.
- ↑ Haqqi, A., Khurram, M., Din, M. S. U., Aftab, M. N., Ali, M., Ahmed, H., & Afzal, M. S. (2020). COVID‐19 and Salmonella Typhi co‐epidemics in Pakistan: A real problem. Journal of medical virology.
- ↑ Chatham-Stephens K, Medalla F, Hughes M, Appiah GD, Aubert RD, Caidi H, et al. (January 2019). "Emergence of Extensively Drug-Resistant Salmonella Typhi Infections Among Travelers to or from Pakistan - United States, 2016-2018". MMWR. Morbidity and Mortality Weekly Report. 68 (1): 11–13. doi:10.15585/mmwr.mm6801a3. PMC 6342547 . PMID 30629573.