Baruang kutub

Baruang kutub
Baruang kutub di Alaska, Amerika Sarikat
Klasifikasi ilmiah
Kingdom:	Animalia
Phylum:	Chordata
Class:	Mammalia
Order:	Karnivora
Family:	Ursidae
Genus:	Ursus
Species:	maritimus
Pasebaran baruang kutub di berbagai nagara

Baruang kutub adolah baruang nan iduik di Banua Antartika, disabuik juo baruang es. Mamalia iko mamiliki bulu nan taba barwarna putiah. Bulu ko mambantu nyo manyamarkan diri di lingkuangan es jo salju. Bulu di badan baruang kutub dapek mancapai panjang sakitar 5 hinggo 15 cm. Bagian nan paliang panjang dari bulu baruang kutub biasonyo tadapek di lihia jo bahu. Katiko musim dingin tibo, bulu baruang kutub akan tumbuah labiah taba sarato . Bulu ko bafungsi sabagai isolator suhu, manolong inyo untuak mampahankan suhu badannyo di lingkungan nan dingin. Katiko musim panas, bulu baruang kutub nampak labiah tipih sarato bawarna kacoklatan. Iko disebabkan karano bulu musim dinginnyo rontok, baganti jo bulu baru nan labiah tipih tumbuah sabagai panyasuaian ka suhu nan labiah angek. ^[1][2]

Baruang kutub marupoan salah satu mamalia nan gadang, baruang jantan mamiliki barek sakitar 400 - 800 kilogram, samantaro baruang batino mamiliki barek 180 - 360 kilogram. Tinggi bahu pado baruang mancapai 1,2 meter hinggo 1,5 meter. Di sampiang baruang mamiliki badan nan gadang, inyo mamiliki cakar nan panjang bisa mencapai sekitar 5-10 sentimeter, bagantuang pado individu. Cakar nan kuek sarato tajam, baguno untuak mancari makanan, mamacahkan es, sarato untuak baranang. Baruang kutub mamiliki kaki nan pendek untuak mnolong inyo manggarik di ateh salju jo es sacarao efisien. Baruang kutub juo mamiliki iduang itam jo gadang nan marupoan salah satu ciri khas inyo. ^[3][4]

Baruang kutub mamiliki babarapo caro untuak baburu mangsonyo, biasonyo baruang kutub mamangso anjiang lauik dan hewan lainnyo. Barikuik babarapo caro baruang kutub dalam mancari mangsonyo. ^[2]

Baruang kutub acok baburu di ateh lapisan es lauik. Inyo akan maintai di sakitar lubang-lubang es tampek anjiang lauik naik ka ateh permukaan untuak mandapekan udaro. Baruang akan manunggu di dakek lubang ko sarato ka manyarang katiko anjiang lauik tibo. ^[5]

Baruang kutub santiang dalam baranang dan dapek mangaja anjiang lauik di dalam aia. Inyo manggunoan anggota tubuh nyo untuak baranang sacaro tanang jo hati-hati sarato manggunoan panciuman nyo nan tajam untuak mandeteksi mangsonyo, lalu perlahan mandakek ka mangsonyo sabalun manyarang. ^[6]

Baruang kutub dapek juo manggunoan tampek nan tinggi di ateh permukaan es untuak mamantau aktivitas mangso di bawahnyo. Inyo bisa mamanjek batu es atau mamanfaatkan formasi alam lainnyo untuak mandapekan kamudahan mancari mangsanyo. ^[6]

Makanan utoma baruang kutub adolah anjiang lauik. Iko adolah sumber protein utamo nyo. Salain anjiang lauik, baruang kutub bisa juo mamakan babagai jinih mamalia lauik jo ikan. Kabanyakan makanan baruang kutub adolah hewan-hewan nan hiduik di lauik atau bagantuang pado lauik. Barikuik adolah babarapo makanan baruang kutub. ^[2]

Baruang kutub mamakan babarapo jinih anjiang lauik saroman anjiang lauik baurek, anjiang lauik abu-abu, sarato jinih anjiang lauik lainnyo.

Baruang kutub dapek juo mamakan ikan, nan utamo di daerah nan mamiliki populasi ikan nan cukuik banyak.

Nan utamo jinih buruang lauik ketek jo talua buruang lauik nan dapek dijangkau dek baruang.

Saroman anjiang lauik mudo atau bayi anjiang lauik, namun baruang kutub jarang mamburu mangso nan sagadang iko surang diri.

Baruang kutub bisa juo mamakan tumbuahan lauik sarato karang jiko mangso lain indak ado. ^[6]

Musim kawin baruang kutub tajadi di bulan April hinggo Juni, pado wakatu ko baruang batino akan mancari pasanannyo. Baruang kutub batino malapehan feromon untuak mancari paratian baruang jantan. baruang batino bisa mamiliah untuak manarimo atau manulak pasangan nan maminta kawin. Sausai mandapek pasangan, baruang jantan jo batino akan manganai . Katiko manganai, baruang jantan akan mambuahi sel talua di dalam badan baruang batino. Sausai proses pambuahan, baruang batino mamasuaki maso kahamilan. Kahamilan balansuang salamo sakitar lapan bulan. ^[7]

Baruang batino akan mancari tampek nan aman sarato talinduang untuak malahiakan. Tempek ko biasonyo barado di gua atau calah batu di tapi pantai atau di dalam es. Satalah mandapekan tampek nan aman baruang batino akan malahiakan ciek atau duo anak baruang, nan disabuik anak-anak baruang kutub. Anak-anak ko talahia dalam kaadaan buto, tuli, sarato ukuran badan nan kectek, tatapi anak baruan mamiliki pertumbuhan nan cukuik capek. ^[8]

Katiko baruang batino alah malahian anak baruang inyo malinduangi bana anaknyo. Inyo akan manyusui sarato marawat anak-anak nyo salamo babarapo bulan patamo. Anak baruang akan disusui jo induaknyo salamo sakitar duo tahun. Aia susu baruang kutub banayak manganduang nutrisi sarato mambantu anak-anak nyo untuak gadang jo bakambang sacaro rancak. ^[9]

Eksploitasi pado baruang kutub adolah hasil dari babagai aktivitas manusia nan alah mampangaruahi populasi sarato habitat pado baruang kutub salamo ratusan tahun. Barikuik adolah babarapo sajarah eksploitasi pado baruang kutub: ^[10]

• Paburuan tradisional: Salamo ratusan tahun, suku-suku pribumi di daerah Arktik manggunoakan bagian badan dari baruang kutub untuak mamanuahi kabutuhan hiduik nyo. Inyo mamanfaatkan kulik, dagiang, tulang, sarato lamak baruang.
• Eksploitasi jua-bali awal: Pado abad ka-18 jo ka-19, baruang kutub manjadi target eksploitasi jua-bali dek parusahaan-parusahaan nan mancari kulik jo lamak baruang untuak di jua-bali. Parusahaan-parusahaan iko acok ikuik dalam paburuan bealabiahan nan marusak populasi baruang kutub.
• Industri paburuan kulik: Pado mulo abad ka-20, ado industri paburuan kulik nan gadang untuak mamanuahi permintaan kulik baruang kutub untuak mambuek mantel bulu. Inko manyababkan panurunan populasi baruang kutub di babarapo daerah.
• Pengaruah parubahan Iklim: Dalam 10 tahun terakhir, pamanasan global jo pancairan es lauik di wilayah Arktik alah mampangaruahi habitat alami baruang kutub. Pancairan es lauik mambuek baruang lauik sarik manacari mangso utama nyo, saroman anjiang lauik, samakin sarik. ^[11]

1. ↑ Rizki, Anisa. "Bukan Putih, Ternyata Ini Warna Asli Beruang Kutub". detikedu (dalam bahasa Indonesia). Diakses tanggal 2023-09-15. 
2. ↑ ^{a b c} Figueirido, B.; Palmqvist, P.; Pérez‐Claros, J. A. (2009-01). "Ecomorphological correlates of craniodental variation in bears and paleobiological implications for extinct taxa: an approach based on geometric morphometrics". Journal of Zoology (dalam bahasa Inggris). 277 (1): 70–80. doi:10.1111/j.1469-7998.2008.00511.x. ISSN 0952-8369.  Periksa nilai tanggal di: |date= (bantuan)
3. ↑ Internet Archive, Gerald L. (1982). The Guinness book of animal facts and feats. Enfield, Middlesex : Guinness Superlatives. ISBN 978-0-85112-235-9. http://archive.org/details/guinnessbookofan00wood. 
4. ↑ "Adaptations & Characteristics | Polar Bears International". polarbearsinternational.org (dalam bahasa Inggris). Diakses tanggal 2023-09-15. 
5. ↑ "Ternyata Mamalia Laut! Cari Tahu Fakta Unik Beruang Kutub Lainnya Yuk". www.ef.co.id (dalam bahasa Indonesia). Diakses tanggal 2023-09-15. 
6. ↑ ^{a b c} Russell, Richard H. (1975-01-01). "The Food Habits of Polar Bears of James Bay and Southwest Hudson Bay in Summer and Autumn". ARCTIC (dalam bahasa Inggris). 28 (2): 117–129. doi:10.14430/arctic2823. ISSN 1923-1245. 
7. ↑ Derocher, Andrew E.; Andersen, Magnus; Wiig, Øystein; Aars, Jon (2010-05-01). "Sexual dimorphism and the mating ecology of polar bears (Ursus maritimus) at Svalbard". Behavioral Ecology and Sociobiology (dalam bahasa Inggris). 64 (6): 939–946. doi:10.1007/s00265-010-0909-0. ISSN 1432-0762. 
8. ↑ Stirling, Ian (2011). Polar bears: the natural history of a threatened species. Markham, Ont: Fitzhenry & Whiteside. ISBN 978-1-55455-155-2. 
9. ↑ Derocher, Andrew E. (2012). Polar bears: a complete guide to their biology and behavior. Baltimore: J. Hopkins university press. ISBN 978-1-4214-0305-2. 
10. ↑ Engelhard, Michael (2017). Ice bear: the cultural history of an Arctic icon. Seattle: University of Washington press. ISBN 978-0-295-99922-7. 
11. ↑ Heemskerk, Sarah; Johnson, Amy C.; Hedman, Daryll; Trim, Vicki; Lunn, Nicholas J.; McGeachy, David; Derocher, Andrew E. (2020-12-01). "Temporal dynamics of human-polar bear conflicts in Churchill, Manitoba". Global Ecology and Conservation. 24: e01320. doi:10.1016/j.gecco.2020.e01320. ISSN 2351-9894.