Trômbônina
Ny trômbonina dia zavamaneno tsofina. Mamoaka feo izy rehefa mampihovitrovitra ny rivotra ao anatin' ilay zavamaneno ny molotra mitsoka sy mihovitrovitr' ilay mpilalao. Manana vatana miendrika varingarina toy ny trompetra ny trômbônina, mifanohitra amin' ny zavamaneno varahimavo izay manana vatana miendrika ampahan-kitsoloha.
Ny teny hoe "trômbônina" dia avy amin' ny teny italianina hoe tromba ("trompetra") sy -one (tovana midika hoe "lehibe"), noho izany dia midika hoe "trompetra lehibe" io anarana io.
Misy karazany roa ny trômbonina raha ny firafitry ny tenany no heverina, dia ny trômbonina misy korisa sy ny trômbonina misy pistô na fitavoka. Saika ny trômbônina rehetra dia mampiasa korisa - fa tsy fitavoka ampiasaina amin' ny zavamaneno varahimavo hafa - mba hanovaovana ny hahavon' ny feony hahazoana ny maripeo tiana havoaka. Tranga maningana ny trômbônina misy pistô, izay mampiasa pistô telo mitovy amin' ny an' ny trompetra. Anisan' ny zavamaneno tsofina vitsy izay tsy mila fampiasana ny rantsantanana tsirairay ny fahaizana azy ny trômbônina misy korisa.
Ny trômbônina mahazatra indrindra dia ny trômbônina tenôra sy trômbônina beso. Na ny trômbônina tenôra na ny trômbônina beso dia manana rejisitra ambany noho ny an' ny trompetra. Ny endriny lava sy miolika toy ny S ary indrindra ny fizaràna fantsona miendrika varingarina, izay magatonga azy hanana feo mazava kokoa, dia mampiavaka azy amin' ny eofôniôma na ny sakshôrna izay manana rejisitra mitovitovy amin' ny azy sady mamoaka feo malefaka kokoa vokatry ny fantson' izy ireo miendrika ampahan-kitsoloha.
Ampiasaina amin' ny karazana mozika maro ny trômbônina, hatramin' ny mozika klasika ka hatramin' ny jazz, anisan' izany ny salsa, ny ska, ny funk na ny mozika miaramila, sns.