Giuann Capitel Quatordes

La Parola del nost Signur ciapada inscí cuma l'è de'l Növ Testament e vultada adess in del nost parlà Insübregh del didincö.

1 Che'l vost cör 'l gh'abia no pagüra! Credíi in del Signur e credíi in mi! 2 In del palazz del me Pader gh'è 'na mota de cà. Se l'eva minga inscí, avaría díi a violter: mi vuu a preparav la cà? 3 E quand che mi vuu a preparav la cà, a vegni pö 'ncamò 'ndree a töv, inscí che violter sarii semper insema a mi. 4 E la via al sit indua mi vuu, violter la cugnussii giamò, nè.

5 E alura 'l Tumàs 'l ghe fà: Signur, indua ti te veet, nüm 'l sem no: cuma l'è che fem a saè la via de andagh? 6 E alura 'l Crist 'l ghe dis al Tumàs: mi a sunt la via, e la veridaa e la vita; nissün 'l vegn al Pader föra che cunt mi. 7 Se violter cugnussii mi, alura cugnussii anca 'l Pader. E de 'dess inanz podi div che 'l me Pader violter l'íi cugnussüü de bun e l'íi anca vedüü.

8 E alura 'l Filíp 'l ghe dis: cia và, Signur, fàn cuntent e fàn vedè 'l Pader, per piasè. 9 E 'l Jesüss 'l ghe dis: mi sunt staa chinscí cunt violter tüt chel temp chi e ti te me cugnusset mingamò, Filíp? Quij che me veden mi, veden anca 'l Pader. Sa l'è che te seet dree a dì, alura, 'fàn vedè 'l Pader, per piasè'? 10 Te ghe credet no ti che mi sunt in del Pader e 'l Pader l'è in mi? Fiö, i Parol che mi sunt dree a div hinn minga i mee, ma quij del Pader che'l viv in mi e 'l fà 'l so laurà in mi. 11 Credíim: mi sunt in del Pader e'l Pader l'è in mi; e se ghe credíi no ai mee parol, almanch credíigh a'l me laurà.

12 In veridaa mi a ve disi: tücc quij che in mi ghe creden, saràn bun de fà anca lur quel che sunt dree a fà mi, e pövess che saràn bun de fà ancamò de mej; perchè mi sunt la Via al Signur. 13 E quel che violter me ciamareet de fà, mi'l faruu sí, inscí che la Gloria del Pader la se spegiarà in del Fiö. 14 Quel che violter ciamareet in del me Nom, mi 'l faruu, e'l faruu de bun.

15 Se violter me vurii ben, alura fee 'ma ve disi de fà. 16 Inscí che mi parlaruu cunt 'l Pader e Lü 'l ve daraa una cunsulaziun che la saraa insema a violter per semper: 17 el Spiret de la Veridaa che'l mund l'è minga bun de capì, perchè 'l mund 'l ved no. Violter, al cuntrari, 'l cugnussii chel Spiret chi perchè 'l saraa semper intra violter.

18 Mi ve lassi minga chi cumpagn de orfen, cara i mee bagaj: vardee ben che mi vegnaruu 'ncamò 'ndree intra violter. 19 Un puu de temp anmò e pö 'l mund 'l me vedaraa pü. Però violter sarii semper bun de vedèm, perchè mi vivaruu semper intra violter. 20 Tücc i dí sarii bun de vedè che mi sunt insema al Pader, e violter insema a mi, e mi insema a violter. 21 Quij che ghe dàn a trà a la mia Parola, hinn quij che me vören ben. E quij che ghe vören ben a mi, 'l me Pader ghe vuraraa ben anca Lü a lur, e mi ghe vuraruu ben a lur anca mi, e lur saràn semper bun de vedèm.

22 E alura 'l Giüda, ma minga l'Iscariota, nè, 'l ghe fà: cuma l'è che l'è che ti te se vöret fà vedè de nüm, ma minga del mund intregh? 23 E'l Jesüss 'l gh'ha respundüü: quij che me vören ben, ghe dan a trà a la mia parola; e 'l me Pader ghe vuraraa ben anca Lü e alura nüm andarèm de Lü a fà sü cà e vivarèm tücc insema cunt Lü in del so Palazz. 24 Quij che però me vören minga ben, ghe dan minga a trà a la mia Parola. E la Parola che violter íi sentüü, l'è minga la mia de Parola, ma la vegn drissa drissa de'l Pader che'l m'ha menaa chinscí intra de violter.

25 L'è chess chi che mi sunt dree a div fin del dí che sunt riaa chi intra de violter. 26 Ma el Spiret Sant che'l me Pader menaraa chinscí in del me nom, 'l ve regurdaraa tüt quel che mi v'huu cüntaa sü, cara i mee bagaj.

27 Mi a ve duu la Pas, e la mia Pas la saraa semper intra violter. Quel che mi sunt dree a dav l'è minga roba de chel mund chi, a l'è ben olter. Che'l vost cör 'l gh'abia minga pagüra! 28 Violter ii ben sentüü quel che v'huu dii: mi, de chi a poch, andaruu sí via, però pö vegnaruu anmò 'ndree. Se violter me vurii ben, alura sarii cuntent che mi me'n vuu del me Pader, perchè 'l me Pader l'è 'ncamò püssee fort de mi. 29 E adess v'huu propi dii tüsscoss, inscí che pö, quand che 'l süced de bun, violter sarii bun de capì sa l'è che l'è dree a süced.

30 E 'dess parlaruu pü un gran che cunt violter perchè 'l Prinzep de chel mund chi l'è dree a 'gnì. Cuntra de mi lü 'l po fà nagot già che mi sunt ben püssee fort de lü; 31 però 'l mund 'l gh'ha de vedè che mi al me Pader ghe vöri ben e fuu inscí 'ma 'l m'ha dii Lü. Cià va, sü, volzeves in pee e vem fort. Andèm via de chí.

• ← Indree a Capitel Trides
• Inanz a Capitel Quindes →
• A l'indes