Ghitara a dodes corde

Quest articol chì l'è scrivud in lombard, con la Noeuva Ortografia Lombarda

Quella vos chi la gh'ha minga di font o inn trop poche. Per pieser, sgionta di font a la vos. Per havégh un'ideja di altre vos senza font, vardee chichinscì.

La ghitara a dodes corde a l’è un tip particolar de ghitara che a ciascheduna di ses corde usuai la ghe n’è missa de fianch un’altra incordada a l’ottava de sora, foeura che per i prim do cobie, cordad a l’unison.

El timber de 'sta ghitara chì l’è assosen pien e ‘l se impresta ben a fa el lavorà de l’acompagnament, ancaben i esisten anca di esempi de utilizazzion come solista. Un esempi, molto conossud de quell tip de ghitara chì a l’è rappresentad de l’introduzzion de Wish You Were Here di Pink Floyd, in la qual una ghitara a dodes corde l’eseguiss la part de l’acompagnament, intanta che 'na ghitara a ses corde la fa el mester de la ghitara solista.

El prim che l’ha marcad l’importanza de la ghitara a dodes corde l’è stad el William Ledbetter, pussee conossud come Leadbelly, in del period 1930-1950, e ‘l n’è diventad on virtuos.

El Roger McGuinn a metà di agn sessanta l’ha fad de la soa Rickenbacker 370/12 la marcadura de fabrica doperada de la banda statunitensa The Byrds. Anca i Beatles i eren solit a doprà i ghitare a dodes corde, per esempi in You've Got to Hide Your Love Away, indove ‘l John Lennon el sona una Framus acustica a dodes corde, o in If I Needed Someone, indove che ‘l George Harrison el sona una Rickenbacker 360/12.

Un quai musicista (un esempi che tut el conossen l’è el ghitarista statunitens Leo Kottke, ma anca i Jimmy Page), el la dopera tant quant o pussee de la ghitara a ses corde; in del 1969 el Kottke l’ha registrad un disch ciamad 6 & 12 String Guitar indove che ‘l marca l’importanza de quell istrument chì. De sorapuu, anca el ghitarista blues rock, el Jimi Hendrix l’ha doperad la ghitara a dodes corde in la soa version acustica de Hear My Train' A Comin'.

Anca el David Bowie l’ha doperad 'sta ghitara chì per tant di so concert, compagn per esempi del famos Ziggy Stardust Tour del 1973. El Brian May l’ha doperad quell tip chì de ghitara in del cors di tour di Queen per insubìss, in duet cont el Freddie Mercury, a sonà i bran Love of My Life e '39; el model preferid del May a l’è la "Ovation Pacemaker 1615", bandonada a la fin del "Freddie Mercury Tribute Concert", inscambi de una Guild Jumbo, che l’è ‘dree a doperà anmò adess.

L’Anthony Phillips, el prim ghitarista di Genesis, l’ha semper fad un’utilizazzion granda de quell tip de istrument chì. El so album Twelve l’è eseguid del tut con la ghitara a dodes corde come istrument indeperluu. I Genesis medesim hann doperad asossen quell istrument chì, in particolar in del period-Gabriel. La prima part de la suit Supper's Ready, per esempi, l’è stada eseguida de tri ghitare a 12 corde, sonada del Steve Hackett, del Mike Rutherford e del Tony Banks. In tra i italian chi ch’i hann semper doperad la ghitara a dodes corde inn stad l’Edoardo Bennato, el Lucio Battisti e l’Herbert Pagani.

Del pont de vista creativ, la ghitara a dodes corde l’è pressappoch quella tradizzional foeura che la "paleta", che la gh’ha denter on numer pussee alt de mecaniche. I mecaniche i poden vesser installad indeperlore o con di borlon de denter. La ghitara a l’è fornida de un’anima missa denter in del manich, che desgià che la gh’ha de dàgh contra de ‘na trazzion quasi dobia, l’è fada su de vuna o de do sbare (e per quest l'è ciamada a doba azzion).

I esisten di modei folk, eletrich, resofonich e semiacustich, i corde de la qual inn domà de metal. El tip minga eletrich el preved no l’usasg del pont barbellad per via de la tension magiora di corde, ancaben a gh’è ‘na quai ecezzion.

• 
  Fender Stratocaster XII
• 
  Guild Starfire SF-XII
• 
  Yamaha FG720S-12

L'incordadura, a partì de la corda pussee sotil l’è:

• 1ª corda MI
• 2ª corda MI
• 3ª corda SI
• 4ª corda SI
• 5ª corda SOL
• 6ª corda SOL (incordada a l'otava de sora)
• 7ª corda RE
• 8ª corda RE (incordada a l'otava de sora)
• 9ª corda LA
• 10ª corda LA (incordada a l'otava de sora)
• 11ª corda MI
• 12ª corda MI (incordada a l'otava de sora)

El tip a dodes corde l'è sfrutad despess de costruì di ghitare con pussee de vun manich: regordom la "Gibson EDS-1275" doperada del Jimmy Page, di Led Zeppelin e del Slash, di Guns N' Roses, model che l’è vegnud foeura de la famosa "Gibson SG".

Tant ghitarista i fann costruì di modei personai, compagn de la "Ibanez Jem" a tri manich del Steve Vai, di quai vun manich l'è a dodes corde e vun a ses corde senz tast; el Brian May, ghitarista di Queen, che in del 2012 el s’è insubid in del tour "Queen + Adam Lambert" e poeu in la prima replica de la soa Red Special cont el tip a manich dobii, vun a dodes e l'alter a ses corde.

• 
  La Gibson EDS-1275
• 
  La Ibanez Jem a tri manich