Anglicanesim
|
Quest articol chì l'è scrivud in lombard, con la Noeuva Ortografia Lombarda |
L'anglicanesim a l'è 'n ram del cristianesim ocidental che la gh'ha origin in del scisma anglican, part de la pussee granda reforma protestanta, a vardà i so liturgie, dotrine e tradizzion. L'è anca vuna di tradizzion pussee seguide in del mond cristian, i member de la comenion anglicana inn pussee de 110 milion, dedree apena ai batezad de la Gesa catolega e de la Gesa ortodossa. I province de la comenion anglicana inn in piena comenion con l'arcivescov de Canterbury, che l'è vist 'me un primus inter pares di vari primad e che 'l guida la conferenza de Lambeth e 'l Consili Consultiv Anglican. Gh'è anca di gese foeura de la comenion anglicana che se ciamen comunque inscì, despess part di moviment del realineament anglican o del moviment anglican de continuazzion.
La fed di anglican la se fonda in su la Bibia, in su la sucession apostolega e la tradizzion di apostoi e in sui scrit di pader de la Gesa. Anca se de origin catolega, desgià che s'inn separad de Roma per el matrimoni de l'Enrigh VIII, el ransgiament lisabetian l'ha mitud in ciar l'independenza de la gesa inglesa de quella romana e i noeuv formulari del secol quell de sedes hann tacad a ciapà vari principi protestant dent, considerade del Thomas Cranmer 'me a mità in tra el calvinism e 'l luteranesim.
In del secol quell de derset la Gesa anglicana e la compagna Gesa d'Irlanda hann tacad a vedéss 'me una via de mez in tra el catolicesim e 'l protestantesim, a mostrà 'n identità "catolega e reformada". A bon cunt, l'è ancamò reson de dibater el nivell de reformazzion e de svesinanza a la Gesa romana o al protestantesim di varie Gese de la comenion. El termen "anglicanesim" el vegn foeura in del secol quell de desnoeuv, a causa del slargàss de l'Imperi ingles e de l'organizazzion di gese locai in sul modell di ex colonie britanneghe in America, che hann ciapad 'na strutura autonoma, a restà comunque ligade a la Gesa inglesa.
Riferiment
[Modifega | modifica 'l sorgent]Alter proget
[Modifega | modifica 'l sorgent]
Wikimedia Commons el gh'ha dent imagin o alter archivi su Anglicanesim