Tasmanië

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Tasmanië is 'n eilandj en 'n deilstaot van Australië. 't Ligk zuudoeastelik van 't Australisch kóntinent en wuuert daovan gesjèdj dore Straot Bass. De houfstad is Hobart, en op Sydney nao is det de aadste stad van Australië. Op 't eilandj wone ruum 'n half miljoen luuj.

't Eilandj is in 1642 óntdèk gewore door Abel Tasman, nao waem 't ouch verneump is gewore. Oearsprunkelik heet 't aevel Van Diemenslandj, nao Anthonie van Diemen, de goevernäör van Indië dae Tasman op zien reis gesjik haw.

In vergelieking mit 't vastelandj is Tasmanië meh klein. Daotaengen haet 't waal zón viefhóngerd zelfstenjige besjurmdje gebiede die same zón 40% vanne ganse landjoppervlakdje van 't eilandj bedèkke. Det kump doordet 't eilandj hieël lang veuroetstraevendj is gewaes in netuurbesjurming, mer allewiel vörmp houtkap 'n groeate bedreiging, worónger ouch veure Styxvallei mit zien monumentaal buim.

d'n Tasmaansen duvel is e roufbujeldeer det allein op Tasmanië veurkump.