STS-128

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

STS-128 is de naom vaan de 128e Space Shuttle missie. Dees missie is weer een missie nao 't International Space Station. De Space Shuttle Discovery is, naotot ze twie kier is oetgestèld, gelanceerd op 28 augustus 2009, um 23:59 EDT (29 augustus 5:59 Nederlandsen tied). 't Belaankriekste oonderdeil vaan dees missie waor 't aoflevere vaan de Leonardo-module (de zoegenaomde Multi-Purpose Logistics Module, of MPLM), die oonder aandere allerlei experiminte bevatde um de natuurkundege en sjeikundege aard vaan micro-zwoerdekrach te bestudere. 't Gaof drei EVA's (ruimtewandelinge) um oonder aandere 'ne lege ammoniaktank mèt trök te numme.

De bemanning bestoont oet 7 persoene: commandant Frederick W. Sturckow, piloot Kevin A. Ford, en missie specialiste Patrick G. Forrester, José M. Hernández, Christer Fuglesang, John D. Olivas en Nicole Stott. Veur Ford en Stott waor 't de ierste ruimtevlöch. Stott bleef aon boord vaan 't ISS, en Timothy Kopra woort mèt trökgenome.

Aon boord vaan de Discovery waor de Multi-Purpose Logistics module Leonardo, 'ne soort verhuiswage. Dees module weurt gebruuk um apparatuur mèt nao bove te numme. Dees kier waor dat rèkke mèt experiminte, 'ne min-80 vriezer, en oetbreiing um te kinne zörge veur 'ne zès-koppege bemanning vaan 't ISS: rèkke mèt proviand, 'n slaopcompartimint en 'n lochzuveringssysteem. Daoneve woort Colbert mètgenome, 'ne loupband um de bemanning in conditie te hawwe.

Ouch woort nog 'ne volle ammoniaktank mètgenome um te weure verwisseld mèt 'ne lege tank. De ammoniak is bedoeld veur 't keulsysteem.

De missie doorde 15 daog, eine daag langer es gepland. De landing woort twie kier oetgestèld in verband mèt slech weer op 't Kennedy Space Center, de landingssite. Tijdens de missie zien drei ruimtewandelinge gemaak.

In de categorie STS-128 van Wikimedia Commons zeen media gerelateerd aan dit óngerwerp te vènje