Discoursanalyse

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

Discoursanalyse ies, zoawie de naam al verraojd, de cultureel-antropologische en sociolinguïstische weitesjap die ziech bezeg hilt mit 't analysere van 'nen discours, de oarsjpruk van 'ne bepaalden discours en de gevolge van daen discours.

Discourse kinne gans breid mer ouch gans specifiek gedifieneerd weure, dat liegk aan de konteks woa-in de discoursanalyse weurt gepraktiseerd. 'nen Discours ies, gans algemein gezeen, 'n bepaalde meneer van kalle die versjèlt van 'n angere meneer. e Veurbeeld ies wie Louis 'n breef sjrief, sjrief hae dat in 'ne gansen angeren discours es wie Sjeng 'n zelfde soort breef sjrief. De discoursanalyse analyseert dan wat 't versjil is tusje Louis' typischen discours en Sjengs discours, wat veur versjillende effekte Louis en Sjeng höbbe op hun lezers en wat dat waer zou kinne zigke euver de verwachtingspatroane van hun lezerspubliek.

In de praktiek geit discoursanalyse bekans altied euver get maatsjappeleks en in die konteks weurt discours breier gedefinieerd, es 'n meneer van communicere die door versjillende luuj weurt gebruuk en ziech op bepaalde gebeje (vocabulaire is dao 'ne belangrieken doorsjlaaggever in) aofsjeid van angere dominante discourse die in dezelfde konteks diks weure gebruuk. Me kin beveurbeeld 't versjil analysere tusje de socialistischen discours en liberalen discours euver e bepaald actueel polletiek ongerwerp (of ongerzeuke of d'r waal zoaget es 'ne socialistischen discours ies). Me kin de Fransen discourse en d'n Duutsjen discours rondum 'n bepaald historische periode analysere. Me kin ouch de Westersen discours in medicijne en biologie analysere en vergelieke mit die oet 't Oaste, of oet de Middelièwe - en wat dat zaet euver de versjillende maatsjappeleke begrippe in die kontekste. Of me kin 'n analytische vergelieking demonstrere tusje de discourse van de politie en 't leger, en dao-oet conclusies trikke oet de versjillende maatsjappeleke statusse die politie en leger genete in e land.

• Jørgenssen, M.W. & Phillips, L.J.; Discourse Analysis as Theory and Method (2002)