't Roeët
- Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Keersj, es te dit dialek sjpriks.
't Roeët (Nederlands: 't Rooth) ies 'n buurtsjap van Mergraote, in de gemeinte Èèsjde-Mergraote, in 't heuvelland van Zuud-Limburg. De naam kump van 't woord rode, dat gerooide plek in de bösj beteikent. In de aafgeloupe decenia ies hie väöl mergel afgegrave t.b.v. de cementindustrie. Van de 24 häöf en hoezer in 1850 zint 'r in 2000 nog 15 euver. De mergelgroeve 't Roeét ies noe gedeiltelek ingeriech es natuurgebeed mèt druègdale en hellingbösj. In 't deil dat neet geëxploiteerd weurt maoge bezeukersj, die ziech ièrsj moete aanmelle, nao fossiele zeuke.
Mieddenin 't gehuch aan de krusing mèt de waeg Gastes nao Cadier en Keer sjteit saer 1970, 'n groate devotiekapel gewiejd aan Maria Sjterre-der-Ziè. Ze ies opgetrokke van 't sjloopmatriaal van 't veurmalig Hièregood. 't Mariabeeld ies gemaak door Fr. Lommen oet Beesel en 't glaas-in-loadvènster mèt 'n aafbeelding van sint Hubertus en zien jaegersj kump van glazeneer Felix oet Mesjtreech.
In de buurt, tösje 't Roeët en Groeët-Welsde sjteit 'n groate ouw Ling (Lindenboom) geseerd mèt 'n houte waegkruus. Dees Ling zou geplant zin door troepe van Napoleon es weegwiezer. Vanaaf diet punt ies d'r 'n wieds oetziech euver de umgeving en bie helder waer kènt me neve de 9 kèrktores van de umliegkende dörper ouch nog de silhouette zeen van kolemiene op 't Belsj-Limburg en bie Luuk en van DSM in Gelaen.
| ||
|---|---|---|
| Dörper: Bieëmele · Ikkelder · Èèsjde · Groêselt · Keer · Mergraote · Maer · Misj · Norbik · Oêsj-Moarend · Riêkelt · Sjuuëlder · Se-Gietere · Tebannet | ||
| Buurtsjappe en gehuchte: Berg · Bergenhoëze · Breusj · Bruusjterbusj · Gastes · Ge Kruuts · Groeët-Welsde · Herkenter · Hoeg-Kâsjtert · Hoontem · Klae-Welsde · Liebik · Lieg-Kâsjtert · 't Mariadörp (De Klonie) · Moarend · Moersjelt · Oêsj · 't Poelveld · 't Roeët · Sjei · Sjilberg · Sint Antoniusbank · Terhoorsj · Terlinne · Termaar · Ulvend · Vroële · De Wesj · 't Withoês · 't Wolfses | ||