Koeweit

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Koeweit (officieel دولة الكويت) is e klei land in Arabië, aon de Perzische Golf, mèt grenze aon Irak en Saoedi-Arabië. De hoofstad vaan 't land hèt ouch Koeweit. Koeweit besteit oet 'n redelek vröchbaar kös mèt get (9) eilen en wijer oet weuste. 't Haolt ziene riekdom oet d'n olie-industrie: 't land is ein vaan de olieriekste len ter wereld.

Koeweit is verdeild in zes gouverneminte (muhafazat):

• Al-Ahmadi
• Al-Frawaniyah
• Al-Asimah
• Al-Jahra
• Hawali
• Mubarak al-Kabir

De inheimse bevolking is gans Arabisch, meh maak door de olie-industrie inmiddels neet mie de mierderheid oet. 55% is immigrant, veurnaomelek oet Iraan, India, Pakistan en väöl ander Arabische len. Islamitische employees höbbe dus dudelek de väörkeur.

Op de pazjena Kuwait van Wikimedia Commons zeen media gerelateerd aan dit óngerwerp te vènje

Es deil vaan de Mesopotamische kös is Koeweit in de aajdheid ummer deil gewees vaan 't gebeed vaan 'n groete besjaoving, wie de Soemeriërs, de Babyloniërs, de Assyriërs en de Perze. Alexander de Groete vereuverde ouch dit land; 't laog oongeveer op de grens vaan zie riek. Nao 't oetereinvalle vaan dit riek kaom Koeweit iers aon de Seleucide meh al gaw aon de Parthe en de Perze. Vaanaof de achste iew regeerde de Perzische (islamitische) Abbaside-dynastie 't land.

In de zestiende iew woort Koeweit Arabisch wienie 'n groop Arabiere vaanoet 't binneland, woe hoongersnoed hiersde, nao de Perzische Golf trok. Ze verdreve de Perze en stiechde hun eige emiraot. Dit emiraot woort door de Osmaanse Törke vereuverd en deende es veurnaome tösseplaots op de handelsroete vaan Törkije en Arabie nao India. Aon 't ind vaan de negentiende iew lökden 't 't Vereineg Keuninkriek Koeweit vaan 't verzwaakde Törkije aof te numme en in 1899 woort 't 'n officieel Brits protectoraot. In de jaore viefteg greujde de olie-export explosief: Koeweit bleek e paar vaan de groetste oliebronne ter wereld te höbbe. In 1961 woort 't land oonaofhenkelek. Koeweit greujde door zienen olie oet tot ein vaan de riekste len ter wereld meh waor dao zoe aofhenkelek vaan gewore tot 'n crisis in de oliemerret desastreus gevolge kós höbbe. In d'n Ierste Golfoorlog vaan 1980 tot 1988 waor 't verboonde mèt Irak. Toch voont d'n Iraaksen dicatator Saddam Hoessein 't nudeg Koeweit te claime en te annexere, wat heer op 2 augustus 1990 deeg. Heimèt begós de Twiede Golfoorlog. In 1991 veel 'n alliantie vaan 34 len oonder leiing vaan de Vereinegde Staote 't bezatte Koeweit in en dwónge de Irakeze tot euvergaaf. Oet vraakzöch stoke de Iraakse soldaote in opdrach vaan Hoessein alle oliebrónne in brand; 't doorde maonde ietot me die brande oonder control had. Sinsdeen heet 't land permanente aonwezegheid vaan 't Amerikaanse leger gere geaccepteerd.