Purpur

Purpur es un color entre blu e roja. Lo es simil a violeta, ma – diferente de violeta, cual es un color de la spetro otical de lus vidable – purpur es un color composada de la combina de blu e roja. Longo sondas en Europa e la SUA, purpur es la color la plu ofte asosiada con familias real, majia, misterio, e relijiosia. Cuando lo es combinada con ros, lo es asosiada con eroticas, e feminia, e sedui.

Purpur ia es la color portada par ofisiores alta roman; lo ia deveni la color imperal, portada par la renores de la Impero Bizantian e la Impero Roman Santa, e a pos par bispos catolica. Simil en Nion, la color es tradisional asosiada con la imperor e la aristocratia. La color oposada de purpur es jala.

Purpur, diferente de violeta, no es un de la colores de la spetro de lus vidable. Lo no ia es un de la colores de la arco de sielo identifiada par Isaac Newton, e lo no ave sua propre longia de onda de lus. Per esta razona, lo es nomida un color nonspetral. Lo esiste en cultur e arte, ma no en otica en la modo en cual violeta esiste. Lo es simple un combina, en proportios variosa, de du colores xef: roja e blu.

En la teoria de color, un "purpur" es definida como cualce color nonspetral entre violeta e roja (escluinte violeta e roja). La colores spetral de violeta e indigo no es purpures como diseda par teoria de color, ma los es descriveda como purpures en costum comun car los es entre roja e blu.

En la rota tradisional de colores, usada tra tempo longa par depintores, purpur es comun locada entre carmesi e violeta. En un varia pico diferente, en la rota de colores HSV, lo es locada entre majenta e violeta. Esta tinje es a veses nomida purpur eletrical.

En la sistem de colores RGB (nomida per la nomes engles de la colores roja (red), verde (green) e blu (blue), e usada per crea cada de la colores en un scermo de computador e un televisador), la estende de purpures es creada par misca lus roja e blu de intensias variante sur un scermo negra. La color purpur normal de HTML es creada par misca lus roja e blu en intensia egal, a un cuantia de brilia cual es media entre potia plen e oscuria.

En primi de color, purpur es representada a veses par la color majenta, o a veses par misca majenta con roja o blu. Lo pote es ance creada par misca sola roja e blu, ma en esta caso la purpur es min briliante par causa de un satura o intensia plu basa. Un purpur min briliante pote es ance creada con lus o pinta par ajunta alga cuantia de la color xef tre (verde per lus; jala per pigmento).