Fermento

Fermentos es microorganismes eucariotal e monoselulal clasida como membros de la rena de fungos. La fermento prima ia orijina sentos de miliones de anios a ante, e 1500 spesies es identifiada. Los composa sirca un persento de tota spesies de fungos descriveda. Lo ia evoluida de asendentes multiselulal, con alga spesies cual ave la capasia per developa cualias multiselulal par forminte cadenas de selulas brotinte juntada nomida pseudohifas. La grandia de fermentos varia multe, dependente de la spesies e la ambiente, tipal sirca tre o cualtro micrometres de diametre, an si algas pote creses a 40 micrometres. La plu de fermentos reprodui nonsesal par mitose, e multe reprodui par la prosede de divide nonsimetre nomida broti.

Fermentos, con sua abitua de crese como monoselulas, pote es contrastada con mofos, cual produi hifas. Spesies de fungos cual pote usa ambos formas (dependente de temperatur e otra situas) es nomida fungos dimorfe.

Par fermenta, la spesies de fermento Saccharomyces cerevisiae cambia carboidratos a diosido de carbono e alcoles - per miles de anios, la diosido de carbono ia es usada en forni e la alcol en produi bevidas alcolosa. Lo es ance un organisme importante como un model en rexerca sur la biolojia de selulas, e es un de la plu rexercada microorganisme eucariotal. Rexercores ia usa lo per oteni informa sur la biolojia de la selula eucariotal e ultima la biolojia de umanas. Otra spesies de fermentos, como Candida albicans, es patojenes oportunal e pote causa infetas en umanas. Fermentos ia es resente usada per jenera eletrica como biocombustables e per produi etanol.

Fermentos no composa un grupo singular tasonomial o filojenetica. La parola "fermento" es comun usada como un sinonim per Saccharomyces cerevisiae, ma la diversia filojenetical de fermentos es mostrada par sua clasi en du filos separada: la Ascomycota e la Basidiomycota. La fermentos brotinte ("fermentos vera") es clasida en la ordina Saccharomycetales, en la filo Ascomycota.