Disenteria

Disenteria es un tipo de gastroenterite cual resulta en diarea sanguosa. Otra sintomes pote inclui febre, dole adomenal, e un sensa de feci noncompleta. Complicas pote inclui desidrata.

La causa de disenteria es usual la baterias de la jenero Shigella, en cual caso lo es conoseda como xigelose, o la ameba Entamoeba histolytica; alora lo es nomida amebiase. Otra causas pote inclui alga cimicales, otra baterias, otra protozones, o vermes parasito. Lo pote sperde entre persones. Fatores de risca inclui la contamina de comedas e acua con fece par causa de ijenia povre. La prosede fundal conserna la inflama de la intestin, spesial de la colon. Medias per preveni disenteria inclui lava manos e securi comedas en viaja en paises de risca alta. An si la state jeneral resolve se en un semana, bevi licuidas sufisinte como la solve de reidrata bocal es importante. On pote usa antimicrobiales como azitromisina per trata casos asosiada con viaja en la mundo developante. An si on no recomenda la usa solitar de paradiareas como loperamida, on pote usa los en junta con antimicrobiales.

Shigella resulta sirca 165 milion casos de diarea e 1,1 milion moris per anio, con cuasi tota casos en la mundo developante. En areas con ijenia povre, cuasi un dui de casos de diarea es par causa de Entamoeba histolytica. Entamoeba histolytica afeta miliones de persones e resulta en plu ca 55 000 moris per anio. Lo aveni comun en rejiones min developada de America sentral e Sude, Africa e Asia. On ia descrive disenteria a la min de la tempo de Hipocrate.