Anticia

La eda antica o anticia es la periodo de la istoria entre la nase de la scrive e la cade de la Impero Roman en la 476, cual marca la inisia de la eda medieval. Lo es la prima de la periodos vera istorial.

La developas en esta periodo ia varia multe par area, ma jeneral on pote nomi lo la eda de spesiali sosial, de la nase de la plu de siensas e artes moderna, e de un crese demografial enorme cual ia crea imperos grande. En esta mesma periodo, alga poplas ia vive ancora en modo preistorial (o protoistorial) e otras ia evolui multe.

La sistem de governa political la plu abundante ia es la monarcia. La comersia ia asende jeneral, con la apare de mone e vias grande de intercambia.

La Anticia conteni du edas:

1. La este antica, con la culmina de la sivilias prima en Asia este (Xina, India) e en Asia sude-ueste (Mesopotamia, Egipte).
2. La Anticia clasica, con la predomina de Elas antica e la Roma.

La este antica ia es do la scrive ia asende e, con lo, la istoria vera. La cultur ia sentri se xef en la vales de la rios grande de Asia (como la Rio Jala, la Rio Ganga, la Rio Tigris e la Rio Eufrates) e a la Rio Nilo.

Multe paises de Asia este (India, Tibet, Xina) e Asia sude-ueste (Egipte, Persia, Mesopotamia) ia developa un varia grande de cultures, con multe linguas (e sistemes de scrive), relijios, sistemes political, etc.

La anticia clasica o mundo elinica-roman ia es la orijina de la ueste, contrastada con la este cual ia domina en la pasada. La romanes, e xef la elinicas, ia aseta influes de la poplas plu antica e ia altera los per crea un cultur orijinal.

An si la cultur elinica ia orijina en la pasada, la importa political de Elas antica ia es la resulta de la vinse contra la Impero Persian en la Geras Persian. Plu tarda, con la concistas de Alexandro la grande, la cultur elinica ia sperde se tra un parte grande de Asia sude-ueste, e ia ave an un efeto peti a la paises de Asia este. A pos, la romanes ia concista Elas e la costa mediteraneo de Asia sude-ueste, e ance teritorios nova a norde de la Alpes.

La documentos prima es restas multe valuosa per la studia de esta eda. An tal, la arceolojia es la fonte xef, car la scrive no ia es multe comun e no ia recolie tota la aspetas de la vive de acel tempo. Descovres importante ia es la piramides de Egipte e la site Pompeii, entre otras.

En esta area sivilias plu vea ia nase ca los Elas e Roma clasica. Per descrive esta loca, Vere Gordon Childe ia crea la terma "Cresente Fertil", definida como la loca do la Revolui neolitica ia aveni (milenio 8 aec) e a pos la Revolui urban (milenio 4 aec). Lo es formida de Irac, un parte de Iran, un parte de Turcia, Suria, Lubnan, Israel, Urdun, Filastin, Arabia e Misre. Cronolojial, lo es un periodo cual nase con la sivilias istorial en la milenio 4 aec (apare de la scrive, la sites e la templos a la mesma tempo como la Eda de Bronze) asta la crese de la Impero Acemenan en la sentenio 6 aec.

Article xef: Elas antica

Elas antica ia es la teritorio de Anticia do la parlores de elinica ia abita. Lo ia es plu grande ca Elas moderna: lo ia inclui Elas e la costa este de Turcia asta la Streta Dardanelia. Ance incluida ia es la colonias elinica de la Mediteraneo e la monarcias eliniste de Egipte e Asia sude-ueste, cual ia es elinicida.

La Impero Roman ia ave un influe plu grande ca sua crese teritorial (6 milion cilometres cuadrida) e sua longia tempal (de 27 aec asta 476 ec en la ueste e asta 1453 en la este): lo ia crea la instituidas political, economial e sosial desidente per la formi de la sivilia ueste, cual on pote regarda como un survive de lo.