Орайот

Орайот (лат. Xeranthemum) – астралылар тұқымдасына жататын бір жылдық өсімдік.

Дүние жүзінде Жерорта теңізінен Оңтүстік-Батыс Азияға дейінгі алқапта өсетін 6 түрі бар. Қазақстанда Жоңғар (Жетісу), Шу – Іле Алатауларының, Батыс Тянь-Шаньның қиыршық тасты тау беткейлерінде, қияларында өсетін 1 түрі – ұзын желайдарлы орайот (X. longіpapposum) бар. Оның биіктігі 10 – 50 см. Сабағы тік, жіңішке, сыртын түк басқан. Көп жапырақты, жапырақтары жарғақ тәрізді, шеттері оратылып жатады. Ашық күлгін түсті гүлдері себет гүлшоғырына топталып, сабағының ұшында жетіледі. Маусым – тамыз айларында гүлдеп, жеміс салады. Тұқымы сыртын ақ түк жапқан ұзынша, қиғаш болады. Орайоттың гүлдерінің бір ерекшелігі – кепкеннен кейін де өзінің пішінін, түсін сақтайды. Сондықтан оларды кептіріп, қысқы гүл шоғын (букет), әдемі гүл тізбегін (гирлянд) жасауға пайдаланады.^[1]