Аққыстау ауылдық округі

Аққыстау ауылдық округі — Атырау облысы Исатай ауданындағы әкімшілік бірлік.

Құрамына Аққыстау, Өркен ауылдары және №17-темір жол айрығы кіреді. Орталығы – Аққыстау ауылы.^[2]. Есіркеп, Шыныбек ауылдары 2007 жылдан бастап Аққыстау селосының құрамына енгізілген.^[3]

2021 жылғы санақ қорытындысы бойынша округтегі халық саны 10267 адамды құрайды.^[4]

Солтүстігінде Тұщықұдық, батысында Жанбай, шығысында Қамысқала ауылдық округтерімен шектессе, оңтүстігін Каспий теңізі шайып жатыр.

1990 жылғы ҚР «Әкімшілік-аумақтық құрылым туралы» Заңына сәйкес Аққыстау селолық округі болып, Аққыстау қала типтес поселкесі статусын қабылдады. Алайда арада аз уақыт өткенде Қазақстан Республикасы әкімшілік-аумақтық бөлінісі мәселелерін шешудің тәртібі туралы Ереже негізінде 1993 жылғы 3 наурыз күні Аққыстау қала типтес поселкесін селолық елді мекен жүйесіне жатқызу туралы облыс әкімі С.Түгелбаевтың шешімі жарық көрді.

Аққыстау ауылдық округі жер көлемі 30 000 га. Ауылдағы 10 610 тұрғын Аққыстау, Өркен және Томан елді мекендеріне топтастырылған. Олардың 875-і зейнеткерлер, 275-і мүгедектер категориясын құрайды. Ауыл тұрғындары мұнай кәсіпшілігінде, теміржол саласында, сондай-ақ мемлекеттік басқару жүйелерінде қызмет жасайды.

Округ бойынша 4 мектеп, 5 балабақша, саз және спорт мектептері, 2 мәдениет үйі, 5 кітапхана, емхана, 2 спорт кешені, т.б. әлеуметтік нысандар халыққа қызмет жасап келеді.

Кәсіпкерлік салада 104 нысан тіркелініп, онда еңбек жасайтындар саны 1000 адамға жетті. 6 мейрамхана, 3 жанар-жағармай стансасы, 2 сауда орталығы, дәріханалар мен дүкендер, техникалық қызмет көрсету стансалары да халық сұранысына сай қызмет жасауда (2018). Округ бойынша 18 шаруа қожалығы тіркелініп, халықты ет пен сүт тағамдарымен қамтып келеді. Село орталығындағы «Зейнеден Ата» мешіті тұрғындарды имандылық пен руханиятқа тәрбиелеуде белсенді қызметімен танылуда. Округ территориясында мемлекет қорғауындағы Таскран тарихи ескерткіші орналасқан.^[5]

• Дәулет Әбілхайыров;
• Меңсұлу Кемелова;
• Сәндібек Ғұбайдуллин;
• Боранбай Халидуллин;
• Рахметқали Жұбанов;
• Мәди Тахаев;
• Қамария Танауова;
• Насыр Дауылбаев;
• Ғаділ Боранбаев;
• Махамбет Ғилимов;
• Таупих Маштахов;
• Мүтиғолла Насиханов;
• Әліби Хайдаров;
• Ғаділ Боранбаев.

• Айғана — Нарын құмының жиегінде орналасқан алқап. Аудан орталығы Аққыстау ауылының солтүстік-батыс жағында 70 км жерде, №12 теміржол бекетінің арқа тұсында.
• Байшақа — өзек. Атырау қаласы мен Аққыстау ауылы аралығындағь жолаушылардың аялдап, демалып өтетін мекен-тұрағы. Атырау-Астрахан автомобиль жолы салынғанша Байшақаның бекеттік маңызы зор болды.