La polpetta del Re/Quader VI

Ona nott el poer Scianin
     el dormiva finalment
     in del bus d’on cantinin
     cont el venter pien de vent;
     ma el san tucc che i noster sogn
     van seconda ai nost bisogn,
     quasichè la Provvidenza,
     vorend minga fann stà senza,
     la ne daga indormentáa
     quell che voeurom dessedáa!

Donch, se quei in sanquintin
     ghan, in sogn, pien el borsin;
     se ghan caus i avvocatt
     e cunt giust i ragionatt;
     se i dottor ghan di maláa;
     se i tosann hin maridáa;
     se i tradii de la morosa,
     indorment, ghe l’han in sposa;
     se i fioeu ghan i belée,
     e i pigott a centenée:

     el Scianin, l’è straevident,
     cont la borlazion ch’el gà,
     ch’el vedess, inscì indorment,
     domà robba de magnà!

Chi ghe compar? — El Diavol de la gola!
     El Diavol tentator,
     ch’el voeur fà god in dona volta sola
                         tutt i savor!

El diavol de quij tai, che voeur sènnà,
     disnà, fà colazion,
     mai desmett, cambià semper, e mai fà
                         indigestion!

Lu el boffa sora ai oeucc al poer Scianin;
     e el ghe dà l’illusion
     de vedè comparì on luganeghin!...
                         Ahn... bon!... Ahn... bon!

Comparen, poeu, formagg, lard e pansciett,
     pollaster e cappon,
     e ogni sort de salamm già tajáa a fett!...
                    Ahn... bon!!... Ahn... bon!!

Compar, dopo, on stuaa, cont on odor
     de mett i convulsion...
     E poeu un bell pèss coi squamm d’argent e d’or!...
                    Ahn... bon!!!... Ahn... bon!!!

E chissà finna a quand sta tentazion
     l’avariss seguitáa...
     Ma, tutt a on tratt, duu colp battuu al porton
                    l’han dessedáa.