DreamWorks Animation

DreamWorks Animation^[1] (líka þekkt sem DreamWorks Animation Studios eða einfaldlega DreamWorks) er bandarískt teiknimyndaver í eigu Universal Pictures, deild innan NBCUniversal sem aftur er dótturfyrirtæki Comcast. Teiknimyndaverið hefur framleitt um 50 teiknimyndir í fullri lengd, þar á meðal nokkrar af tekjuhæstu teiknimyndum allra tíma. Fyrsta myndin sem kom út frá þeim var Antz 2. október 1998. Sú nýjasta er Villta vélmennið (The Wild Robot) sem kom út 27. september 2024.

DreamWorks Animation var stofnað sem deild innan DreamWorks Pictures, með fyrrum starfsfólki Amblimation, teiknimyndadeildar Amblin Entertainment. Það var sett í sérfyrirtæki árið 2004 og árið 2016 var það selt til NBCUniversal fyrir 3,8 milljarða dala.^[2] Í byrjun gerði DreamWork Animations hefðbundnar teiknimyndir, auk stop-motion-hreyfimynda í samstarfi við Aardman Animations, en síðustu ár hefur það eingöngu fengist við tölvuteiknimyndir.^[3] Meðal þekktustu mynda DreamWorks Animation eru Shrek, Madagaskar, Kúng fú panda, Að temja drekann sinn og Tröll, auk mynda um Wallace og Gromit í samstarfi við Aardman. Myndir fyrirtækisins hafa unnið til fjölda verðlauna, þar á meðal þriggja Óskarsverðlauna, 41 Emmy-verðlauna, fjölda Annie-verðlauna, og fengið nokkrar tilnefningar til Golden Globe- og BAFTA-verðlauna.

Til ársins 2005 sá DreamWorks Pictures um dreifingu DreamWorks Animation-teiknimynda. Frá 2006 til 2012 sáu Paramount Pictures um dreifingu, og 20th Century Fox frá 2013 til 2017. Flestar myndir sem komið hafa út frá 2017 hafa farið gegnum Universal Pictures, sem á líka réttinn að eldri myndum.^[4]