Silkeborg

Silkeborg esas dana urbo kun habitantaro 43.158 (ye 1ma januaro 2014).

Silkeborg esas la sideyo dil konsilistaro di municipo Silkeborg (90.016 habitanti en 2015) ed esas anke parto dil metropolo Est-Jutlando (c. 1,2 milion habitanti).

Silkeborg situesas meze dil Jutlando-peninsulo, weste del geografiala centro di Dania.  La urbo situesas an la rivero Gudenå en la kolinoza e verda peizajo di Søhøjlandet, cirkondata da la maxim granda foresto-distrikt di Dania e multa lagi.

La lagi inter Silkeborg e Ry qui ligesas da la Gudenå, konocesas kom Silkeborgsøerne (la Silkeborg-lagi). La urbo dividesas norde e sude da la lago Silkeborg Langsø, qua en la esto dil urbo divenas la rivero Gudenå.

Silkeborg esis la situo di kastelo, monakerio e farm-domeno, establisita dum la 15ma yarcento, 6 km de Alling-Abadeyo.  La moderna urbo kreskis cirkum la papero-muelilo Drewsen og Sønner, establisita en 1844.  Silkeborg Papirfabrik situesis proxim la rivero Gudenå ube Silkeborg-kastelo olim esis, por explotar la rivero kom energio-fonto por la muelilo, kom resurso por papero-produkto, e kom transporto-voyo.

Michael Drewsen, egardata kom fondinto dil urbo, responsis pri la diala jero di la muelilo.  Hodie statuo di Drewsen stacas avan la ancien urbodomo en la urboplaco.  Komisitaro por establisar Silkeborg kom komerceyo fondesis en 1845, e la situo kreskis aden mikra habiteyo, de habitantaro 30 en 1844, a 556 en 1850, e 1204 en 1855.

Municipo-konsilistaro e parokio establisesis en 1855.  La fervoyo konstruktesis en 1871.  Silkeborg ganis la rango di merkat-urbo (købstad) en 1900.  La habitantaro registragesis kom 7228 en 1901, e 8792 en 1911.  Dum la germana okupo di Dania, la Gestapo uzis Silkeborg Bad (balneyo) kom sua dana chefkontoro.

Silkeborg situesas en la regiono Søhøjlandet (lago-altalando) en mez-esta Jutlando, egardata kom un ek la maxim bela regioni di Dania.  La peizajo konsistas grandaparte ek lagi, grandi boski (quala la Silkeborg-foresti) ed ula alteyi di Dania, inkluzanta Himmelbjerget.

Ol esas anke un ek la maxim chera parti di Dania, e la vicina vilajo Sejs konocesas pro sua domegi ed apudlaga "villa"-i en Brassø.

• Silkeborg-Muzeo: La max anciena prezervita edifico en la urbo (1767) esas hodie Silkeborg-Muzeo, ube on povas vidar la naturale mumiigita kadavro di viro de Tollund, qua vivis dum la 4ma yarcento aK.
• Urbo-placo: La anciena placo (Torvet) esas la centro di Silkeborg e kun la cirkondanta stradi esas pediranto-areo.  La placo cirkondesas da la Hotel Dania, la urbodomo e kirko (Silkeborg Kirke).  An la placo esas du fonteni e bronza statuo di Michael Drewsen, fondinto di Silkeborg.  Ye saturdio la semanala merkato situesas hike.
• Hjejlen: La max anciena vaporonavo dil mondo en Hjejlen esas turo-batelo qua departas de la portuo di Silkeborg.
• Aqua: La sensala aquario Aqua esas popularega.  En la interna aquario ed extera animal-parko, fishi ed animali dil dana naturo esas videbla.  La animali inkluzas fishi, uceli, lutri, kastori e ratoni.
• La lago-fonteni: La fonteni en Silkeborg Langsø esas inter la maxim granda en norda Europa.  La fonteni en la lago konstruktesis en 1970.  Li havas splendida lumo-spektaklo e pos sunkusho ol chanjas koloro. La koloro-chanjo sequas programo de 30-40 minuti.
• La SCC-festivalo di country-muziko esas yarala evento depos 1986.  La festivalo eventas en Indelukket dum la duesma semanfino di agosto.
• Riverboat Jazz Festival eventas omnayare dum la lasta semanfino di junio. La festivalo ne eventas en unika loko en Silkeborg, ma en diversa loki cirkum la urbo.
• Hede Rytmer ("Varmega ritmi) esas yarala rock e pop-festivalo qua eventas en Indelukket komence di somero.  La pleanti esas ofte famoza dana bandi, ma anke internaciona artisti.  En 2011 Boney M., 10CC e The Orchestra (olim Electric Light Orchestra) pleis che la 3-dia festivalo.

• Automobilo  Silkeborg konektesas per autovoyi kun Aarhus, Herning, Horsens, Randers e Viborg.  Nova autovoyo kompletigesis en septembro 2016 qua konektas Silkeborg kun Aarhus e Herning.  Regionala autobusi a cirkuma urbi departas de la tren-staciono.  Lokala transporto konsistas ek 12 lokal autobus-voyi qui servas la urbocentro e preurbi.
• Fervoyo  La chefstaciono, Staciono Silkeborg, servesas da la fervoyo inter Aarhus e Herning.
• Aquo  La rivero Gudenå esis dum yari importanta transporto-voyo por pasajeri e vari, ma hodie pasajero-transporto alonge la rivero esas posibla nur por turisti dum somero.
• Aeroportuo  Midtjyllands Lufthavn esas la proxima aeroportuo, situita 40 km nordweste de Silkeborg.  L'aerportuo ofras diala flugi a la dana chefurbo København.