São Caetano do Sul

São Caetano do Sul
Kelk imaji de São Caetano do Sul.
Standardo	Blazono
Lando:	Brazilia
Regiono:	Sud-estala
Stato:	São Paulo
Informo:
Fondita ye:	28ma di julio 1877
Latitudo:	23°37'22S
Longitudo:	46°33'03"W
Altitudo:	760 m
Surfaco:	15,4 km²
Habitanti:	165 655[1] (2022)
Denseso di habitantaro:	10 805,2 hab./km²
Disto de Sao Paulo:	13 km
Horala zono:	UTC-3
Urbestro:	Tite Campanella (PL, 2025-2028)[2]
Mapo:
Oficala retosituo:
https://www.saocaetanodosul.sp.gov.br

São Caetano do Sul esas urbo en Braziliana stato Sao Paulo, ed esas parto di la metropolala regiono di Sao Paulo. Segun la demografiala kontado di 2022, ol havis 165 655 habitanti^[1], kontre 149 571 habitanti en 2010. Lua tota surfaco esas 15.4 km². Ol havas la maxim alta TNP po persono de Brazilia (US$ 31322,00 en 2010) e la maxim granda indexo pri homala developeso di la lando.

Explorero Fernão Dias Pais Leme donis tereni qui nun formacas São Caetano do Sul a monaki del Monakeyo Santa Benediktus (la "Benediktini"), en la nuna Sao Paulo. Camaniere formacesis farmeyo nomizita Tijucuçu. En 1717, la monaki konstruktis kapelo memoriganta Santa Caetanus de Thiène, patrono-santo di laboro e di pano. Kelka yari pose, la monaki kreis ibe un fabrikerio di briki e teguli, qui transportesis tra rivero Tamanduateí. La fabrikerio funcionis til la yari 1870a.

En 1871, lego liberigesis omna filii de sklavi naskinta en Brazilia. Do, l'ordeno di Benediktini decidis liberigar lua sklavi, entote 4 mil en Brazilia. Sen laboro-povo, monakeyi decidis vendar la farmeyo a l'Imperiala Guvernerio di Brazilia, qua instalis koloniala nukleo ibe ye la 28ma di julio 1877, dato konsiderata la fondo dil urbo. La farmeyo dividesis en tereni qui vendesis ad Italiana kolonigiisti. L'unesma grupo di enmigranti originis de Treviso.

En 1883, ferovoyala kompanio São Paulo Railway inauguris treno-staciono en São Caetano. Kolonigiisti komence plantacis terpomo e pose vitobero por produktar vino, til filoxero destruktar la plantacerii.

Poke ante la republiko, kreesis municipo São Bernardo do Campo, e recevis parto di la tereni dil anciena farmeyo. L'altra parto restis teritorio de São Paulo. En 1928, aparis l'unesma idei pri separar São Caetano de Sao Paulo. Fine ye la 24ma di decembro 1948, Adhemar de Barros, lor la guvernisto dil stato São Paulo, sancionis lego kreinta municipo São Caetano do Sul (Sul signifikas "sudo", por diferenciar de l'altra São Caetano, municipo en Pernambuco).

Nun, São Caetano do Sul havas importanta fabrikerio di vehili de General Motors e du universitati.