Mars Express
Mars Express esas misiono di ESA (Europana Spaco-Agenterio) por explorar la planeto Marso. La sondilo lansesis ye 2 di junio 2003 de Baikonur en Kazakstan, ed arivis en orbito cirkum Marso en decembro 2003. La voyajo esis kurta, pro la relatita pozicioni di Tero e Marso ye ta tempo (pro to ol nomizesis "Express").
La sondilo Beagle 2 sendesis de Mars Express Orbiter ye 19 di decembro 2003. La skopo esis ke ol dolce arivus ye la surfaco di Marso por trovar evidentajo di pasinta vivo; tamen la sondilo ne komunikis ye la arivo-tempo, e pos plura esforci komunikar, ESA deklaris ke Beagle 2 esas perdita.
Depos 2004, Mars Express Orbiter sucesoze prenis imaji, di alta qualeso, di la surfaco; facis mineralogiala mapi di la surfaco; sondis la sub-surfaco per radaro; e mezuris la movado e la kompozuro dil atmosfero. La misiono plurafoye extensesis; la maxim recenta extensuro validesas til la fino di decembro 2026.
Ye 3 di junio 2023, por celebrar 20 yari depos la lanseso, imaji transmisesis de la sondilo por direta vidado per la interreto.