Europa

Europa
Instantia de: part of the world[*], continente, region
Coordinatas: 48°41'27.452"N, 9°8'26.232"E
Area: 10 186 000 km²
ID VIAF: [170298814]
ID GeoNames: [6255148]
Commons: Europe

Europa^[1] es un continente e un parte de Eurasia. Europa ha un area de circa 10.790.000 km² (quatro vices minor del area de Asia) e un population de circa 700 milliones de habitantes.

Traditionalmente le nomine Europa se associa con un personage mythologic. Europa (in greco Ευρώπη) esseva le filia de Agenor e Telephassa, soror de Cadmo, un princessa phenicie. In le legenda grec le plus famose super illa, Zeus – manifestante se como un tauro – la capturava e la portava de Phenicia al insula de Creta.

Le antiquitate classic es dominate per le influentia del civilisation grec e latin e del Imperio Roman super le resto de Europa. Le cadita del Imperio Roman e le arrivata de nove gruppos ethnic con nove regnos faceva que Europa se divideva politicamente.

Le principio del Medievo se situa traditionalmente in le anno 476 con le cadita del Imperio Roman del Occidente. Iste evento esseva sequite per multe tentativas de unification e conquesta, que lassava le continente in constante conflictos e guerras durante le Medievo, como le Guerra del Cento Annos. Isto – junctemente con le influentia super le continente de nove gruppos, como le mongoles arrivate per le steppas, o le apparition del islam, creante un barriera que divideva duo culturas e le Mediterraneo e con choches in le frontiera – formava iste epocha in le continente.

Pro Europa, le Etate Moderne marca le initio del processos que multo postea esserea le globalisation, e illo es un tempore in le qual le conflictos bellic esseva plus disastrose, como le Guerra del Trenta Annos.

Le processos economic e le disveloppamento scientific e technologic se accelerava de forma plus notori in iste epocha provocante tensiones que menava a guerras (como le Guerras Napoleonic e le guerras mundial). Hodie le processos al unification se cerca pacificamente, como le caso del Union Europee, cuje origine es le Declaration Schuman de 1950.

Europa es le continente que ha habite le plus grande influentia in le historia del mundo (discopertas, conquestas, colonisationes, movimentos e revolutiones, guerras mundial, etc.).

Europa, le secunde plus parve continente del mundo post Oceania, ha un extension de 10.530.751 km², representante 7% del terras emergite.

Parlante strictemente in terminos del scientia geographic contemporanee, Europa, como Oceania, non es categorisate como continente e es considerate macro-unitates geographic, pois que in le caso de Europa iste macro-unitate geographic es un prolongation occidental del continente eurasiatic. Europa es characterisate per le elevate quantitate medie de costas maritime e oceanic debite al presentia de abundante peninsulas, golfos, mares interne e insulas. Isto e le influentia del Currente del Golfo e le proximitate del desertos calide de Africa e Asia rende le climate in Europa temperate e exceptionalmente benigne pro le habitabilitate human. Le abundantia de costas e vias aquatic ha permittite le transito de populationes e postea su establimento desde le fin del Pleistoceno.

Su principal insulas es Grande Britannia, Islanda e Irlanda.

Actualmente, le politica europee es marcate per le existentia de un unitate de 27 paises de Europa. Illo es le Union Europee. Multe altere statos, principalmente in le Balkanes, es interessate in adherer. Le majoritate del statos europee ha un systema democratic. In despecto de isto, non totos es equalmente disveloppate in derectos del citatanos ben que le derectos fundamental es garantite. Le realisation de iste objectivos es fundamental pro esser parte del UE.

Multe citatanos pote mover se liberemente inter le differente statos de Europa, intra le Spatio Schengen.

Pais	Superficie (km²)	Paises per population (secundo datos del articulo correspondente)	Densitate de population (per km²)	Capital
Albania	28.748	3.600.523	125,2	Tirana
Andorra	468	68.403	146,2	Andorra la Vieja
Armenia	29.800	3.229.900	101,0	Ereván
Austria	83.858	8.169.929	97,4	Viena
Azerbaijan	86.600	8.621.000	97,0	Bakú
Bielorussia	207.600	10.335.382	49,8	Minsk
Belgica	30.510	10.274.595	336,8	Brussel
Bosnia e Herzegovina	51.129	4.448.500	77,5	Sarajevo
Bulgaria	110.910	7.621.337	68,7	Sofia
Cypro	9.251	788.457	85,0	Nicosia
Citate del Vaticano	0,44	900	2.045,5	Citate del Vaticano
Croatia	56.542	4.437.460	77,7	Zagreb
Danmark	43.094	5.368.854	124,6	Copenhagen
Espania	504.851	47.150.800[2]	94,1	Madrid
Estonia	45.226	1.415.681	31,3	Tallinn
Finlandia	336.593	5.157.537	15,3	Helsinki
Francia	675.417	65.073.482	95,9	Paris
Georgia	69.700	4.661.473	64,0	Tbilisi
Germania	357.021	83.251.851	233,2	Berlin
Grecia	131.940	10.645.343	80,7	Athenas
Hungaria	93.030	10.075.034	108,3	Budapest
Irlanda	70.280	4.234.925	60,3	Dublin
Islanda	103.000	307.261	2,7	Reykjavík
Italia	301.230	58.751.711	191,6	Roma
Kazakhstan	2.724.900	15.217.711	5,6	Astana
Lettonia	64.589	2.366.515	36,6	Riga
Liechtenstein	160	32.842	205,3	Vaduz
Lituania	65.200	3.601.138	55,2	Vilnius
Luxemburg	2.586	448.569	173,5	Luxemburg
Malta	316	397.499	1.257,9	Valletta
Moldova	33.843	4.434.547	131,0	Chișinău
Monaco	1,95	31.987	16.403,6	Monaco
Montenegro	13.812	616.258	44,6	Podgorica
Paises Basse	41.526	16.318.199	393,0	Amsterdam
Norvegia	324.220	4.525.116	14,0	Oslo
Polonia	312.685	38.625.478	123,5	Varsovia
Portugal	91.568	10.409.995	110,1	Lisbona
Regno Unite	244.820	61.100.835	244,2	London
Republica Chec	78.866	10.256.760	130,1	Praga
Republica de Macedonia	25.333	2.054.800	81,1	Skopje
Romania	238.391	21.698.181	91,0	Bucarest
Russia	17.075.400	142.200.000	26,8	Moscova
San Marino	61	27.730	454,6	San Marino
Serbia	88.361	7.495.742	89,4	Belgrad
Slovachia	48.845	5.422.366	111,0	Bratislava
Slovenia	20.273	1.932.917	95,3	Ljubljana
Svedia	449.964	9.090.113	19,7	Stockholm
Switza	41.290	7.507.000	176,8	Berna
Turchia	783.562	71.517.100	93,0	Ankara
Ukraina	603.700	48.396.470	80,2	Kiev
Total	26.800.000	843.200.000	31,5

Le economia de Europa es le plus grande del mundo. Le majoritate de su statos pertine al prime mundo. In le seculo 19 se realisava le prime integration moderne del economia de varie statos europee a transverso del union doanal.

Economicamente, Germania es le nation le plus potente de Europa, sequite per Francia, le Regno Unite, Italia e Espania. In terminos de renta per capita, le plus potente es, tanto in Europa como in le mundo, Luxemburgo. Existe un grande disparitate in le ricchessa economic del differente paises europee, assi, durante que in le cinque principal economias le PIB supera le 20.000 euros per persona, Moldova a pena superpassa le 2.000.

Un grande parte del dynamica economic del continente se trova in le functionamento del Union Europee. Desde 2009, 16 statos europee usa le mesme moneta, le euro (€). Le nove realitate del economia mundial, que se ha consolidate in le curso del seculo 21, es marcate principalmente per le disintegration del Union Sovietic, le crescimento del Republica Popular de China e le materialisation del unitate economic de un grande parte de Europa.

In le continente europee existe multe linguas proveniente de varie familias. Istos include: Del gruppo indoeuropee: Le linguas romanic, procedente del latino: espaniol, catalano, francese, italiano, romaniano, portugese, aragonese, asturiano, galleciano, ladino, napolitano, occitano, sardo, siciliano, corso, romancio, wallon. Le linguas germanic: anglese, germano, nederlandese, svedese, danese, norvegiano, islandese, feroese, flamenco, frisiano, luxemburgese. Le linguas slave: russo, polonese, checo, slovaco, bielorusso, ukrainiano, bosniaco, serbo, croato, sloveno, bulgaro, macedone, montenegrino, sorabo. Le linguas celtic: irlandese, gaelico scotese, gallese, breton, cornico, e mannese. Le linguas baltic: letton, lituano Altere linguas indoeuropee: greco, armenio, albanese, romani (tsigano). Del gruppo ugro-finnese: finlandese, lappon (sami), estoniano e hungaro. Del gruppo turco: turco, azeri, kazajo De altere gruppos linguistic: Georgiano Basco Maltese Le dece linguas con le major numero de parlatores es le russo, le germano, le turco, le francese, le anglese, le italiano, le espaniol, le polonese, le ukrainiano e le serbo. In Europa se parla 3% del linguas del mundo.[3]

Gruppos religiose: Europa del nord protestante (Regno Unite, Islanda, Norvegia, Svedia, Finlandia, Danmark, Germania del Nord). Europa del est orthodoxe (Grecia, Russia, Bielorussia, Bulgaria, Ukraina, Georgia, Romania, Macedonia, Moldavia, Montenegro, Serbia). Europa del sud, del west e centro catholic (Citate del Vaticano, Portugal, Espania, Irlanda, Andorra, Monaco, San Marino, Italia, Francia, Belgica, sud de Germania, Polonia, Austria).

Le catholicos es in majoritate in 23 paises, le orthodoxos in 11, le protestantes in 9 e le musulmanes in 4 (Albania, Azerbaijan, Bosnia e Hercegovina, e Turchia). Il ha minoritates religiose intra iste grande conjunctos: Le hebreos es presente in Europa desde le epocha del Imperio Roman, illes ha essite persequite desde le Medievo e suffreva un politica de extermination total durante le Secunde Guerra Mundial. Le islam es presente in le Balkanes, antiquemente parte del Imperio Otoman (Albania, Bosnia e Hercegovina, Kosovo e Macedonia), in Turchia, Azerbaijan e, como consequentia del immigration, in Francia, le Regno Unite, Germania, Espania, le Paises Basse, Belgica, etc. Le religiones del Asia oriente: shintoismo, buddhismo, hinduismo, confuncionismo. Il ha communitates del Fide Bahá'í in tote le paises. Le atheismo es minoritari: Secundo le opera de J. Baudérot, Religión y laicidad en la Europa de los 12, 1994, pagina 259: un quarto del population del UE es "non-religiose" e 5% del europees es atheos. Un sondage facite in 21 paises inter 21.000 personas e publicate in decembre 2004 annunciava que 25% del europeos del west se declarava atheos contra 12% in le paises de Europa central e Oriental. Secundo iste sondage publicate in le Wall Street Journal, 4% del romanianos e 8% del grecos se declarava atheos. Al contrario, 49% del checos e slovacos e 41% de nederlandeses es atheos. Secundo un sondage del CIS, 82,4% del espanioles es catholicos roman e 47,7% es activemente practicante iste religion.

• Appendice:Lista de paises de Europa
• Union Europee
• Europa (Mythologia)

1. ↑ Derivation: Entitates: 1. (it) Europa || 2. (es) Europa || (pt) Europa || 3. (fr) Europe || 4. (en) Europe || Controlo: (de) Europa || (ru) Европа || - (Extra): (la) Europa
2. ↑ "Población padronal a 1 de enero de 2011. Instituto Nacional de Estadística". Consultate le 5 de julio 2011
3. ↑ Sabiask.com

• Historia de Europa in interlingua

Continentes e regiones del Terra

Africa	America del Nord	America del Sud	Antarctica	Asia	Europa	Oceania
America	Australia	Supercontinentes geologic Gondwana • Laurasia • Pangea • Pannotia • Rodinia Columbia • Kenorland • Ur • Vaalbara			Eurafrasia	Eurasia