Սիոսեփոլ

Սիոսեփոլ سی‌وسه‌پل‎
Երկիր	Իրան[1]
Տեղանք	Սպահան
Տեսակ	քարե կամուրջ, կամարաձև կամուրջ, ճանապարհային կամուրջ և ճարտարապետական հուշարձան
Նյութ	քար և աղյուս
Թռիչքների քանակ	33[2]
Հատում է	Զայանդե
Երկարություն	297,76 մետր[3]
Լայնություն	13,75 մետր[3]
Բացման տարեթիվ	1602[2]
Ժառանգության կարգավիճակ	Իրանի ազգային ժառանգություն[1]

Սիոսեփոլ (պարսկերեն սիոսե՝ «եռեսուներեք» և փոլ՝ «կարմուրջ» բառերից), Ալլահվերդի խանի կամուրջ, կամ Ջուղայի կամուրջ, Զայանդեռուդ գետի վրա։ Սպահանի տասնմեկ կամուրջներից ամենաերկարն է։ Կառուցվել է 1599-1602 թվականներին՝ Սեֆյան հինգերորդ արքա Շահ Աբաս Մեծի կամ Առաջինի օրոք։ Կամուրջը կազմում է Սպահանի կենտրոնական փողոցի՝ Չահարբաղի շարունակությունը և քաղաքը կապում է հայկական Նոր Ջուղա թաղամասի հետ։ Երկարությունը մոտ 297.76 մետր է, լայնությունը՝ 13.75 մետր։ Կամուրջն ունի երկու հարկ. վերևի հարկը կառուցված է աղյուսից, ներքևինը՝ քարից։ Սիոսեփոլը ծառայում է նաև որպես զբոսավայր։ Ամառվա ամիսներին, երբ գետի ջուրը նվազում է, կամրջի առաջին հարկը դառնում է մարդկանց հանգստի վայր, այնտեղ բացվում է թեյատուն։ Իսկ երբ ջուրը բարձրանում է, նույն դերն են կատարում կամրջի երկրորդ հարկի օթյակները, որոնք գտնվում են կամրջի երկու կողմերում։

• Սիոսեփոլ բառացի նշանակում է 33 կամուրջ, քանի որ կամուրջն ունի 33 կամար։ Ասում են, որ նախապես եղել է 40 կամար, հետո 7-ը ավերվել են։
• Ալլահվերդի խանի կամուրջ կոչվում է իր հիմնադրի անունով։ Ալլահվերդի խանը ազգությամբ եղել է հայ՝ ծնված Վրաստանում, որին Շահ Աբասը գերևարել է Պարսկաստան, դարձրել մուսուլման ու նշանակել իր զորքի գլխավոր հրամանատար։
• Ջուղայի կամուրջ է կոչվում, քանի որ կամրջի հարավային կողմում է գտնվում հայկական Նոր Ջուղա թաղամասը^[4]։

Վիքիպահեստ նախագծում կարող եք այս նյութի վերաբերյալ հավելյալ պատկերազարդում գտնել Սիոսեփոլ կատեգորիայում։