Ռոժե Կուզինե

Ռոժե Կուզինե; ֆր.՝ Roger Cousinet
Ծնվել է	նոյեմբերի 30, 1881; Արկեյ, Սենա
Մահացել է	ապրիլի 5, 1973 (91 տարեկան); Փարիզի 11-րդ շրջան, Փարիզ
Քաղաքացիություն	Ֆրանսիա
Մասնագիտություն	մանկավարժ, primary education inspector և school teacher
Գործունեության ոլորտ	մանկավարժ
Ալմա մատեր	Բարձրագույն նորմալ դպրոց
Տիրապետում է լեզուներին	ֆրանսերեն
	Roger Cousinet Վիքիպահեստում

Ռոժե Կուզինե (ֆր.՝ Roger Cousinet, նոյեմբերի 30, 1881(1881-11-30)^[1]^[2]^[3], Արկեյ, Սենա^[3] - ապրիլի 5, 1973(1973-04-05)^[1]^[2]^[4], Փարիզի 11-րդ շրջան, Փարիզ^[4]), ֆրանսիացի մանկավարժ, աստերոիդների հայտնաբերող, Ֆրանսիայում առաջադիմական մանկավարժության (Նոր մանկավարժություն) ուղղության վառ ներկայացուցիչներից։

Կենսագրություն

1903 թվականին Փարիզի Բարձրագույն նորմալ դպրոցը (École Normale Supérieure) ավարտելուց հետո անցնում է ուսուցչական աշխատանքի։ Միաժամանակ ֆրանսիացի նշանավոր փիլիսոփա և սոցիոլոգ Էմիլ Դյուրկհեյմի ղեկավարությամբ աշխատում է երեխաների սոցիալական կյանքն ուսումնասիրող ատենախոսության վրա։ 1910-1941 թվականներին եղել է տարրական դպրոցների ավագ տեսուչ։ 1921 թվականին հիմնադրել է Նոր կրթության ասոցիացիան (գործել է մինչև 1939 թվականը), իսկ 1964 թվականին՝ «Կրթություն և զարգացում» հանդեսը, որը Ֆրանսիայում ոլորտի առաջատար պարբերականներից է։

Հիմնական ներդրումը

Լինելով Ֆրանսիայում առաջադիմական կրթության ուղղության առաջամարտիկը՝ Կուզինեն պահանջում էր վերանայել ավանդական դասական կրթության մոդելը, որը հիմնված էր պահպանողական ուսուցման և ըստ սոցիալական պատկանելության երեխաների կրթության տարբերակման վրա։ Նոր (առաջադիմական) կրթության հիմքում, ըստ Կուզինեի, ոչ թե ուսուցչի ազդեցությունն է աշակերտի վրա, այլ աշակերտի աշխատանքն է՝ ուղղված սեփական զարգացմանը։ Երեխաները, ինչպես համոզված էր Կուզինեն, հակված են դրսևորելու կազմակերպվածություն, ջանասիրություն և կայուն առաջընթաց, եթե զբաղվում են ��րենց դուր եկող գործով։

Ըստ Կուզինեի՝ երեխան համառորեն պաշտպանում է սոցիալական զարգացման իր ուղին. նա «հուշում է», «արտագրում է», «խոսում է», իսկ ուսուցիչն ավելի շատ ժամանակ է վատնում դասարանում կարգապահություն հաստատելու համար, քան դասը բացատրելու։ Անկախ ամեն ինչից երեխաներն ապրում են իրենց կյանքով. խմբերում կան առաջնորդներ, քավության նոխազներ, և անընդհատ ամենատարբեր դրսևորումներով պայքար կա աշակերտների և ուսուցիչների միջև։ Ավելին, ինչպես նշում էր Կուզինեն, ավանդական դասավանդման գործընթացը հիմնված է կեղծ կատեգորիաների վրա՝ ծրագրեր, որոնք կապ չունեն կամ քիչ կապ ունեն երեխայի հետաքրքրության հետ, քննություններ, ստուգողական աշխատանքներ և դատավորի դերում հանդես եկող ուսուցիչ։

Վերը նշված խնդիրները հաղթահարելու նպատակով 1920 թվականին Կուզինեն մի շարք ուսուցիչ կամավորների հետ մշակեց ազատ խմբային աշխատանքի մեթոդը, որի էությունը աշակերտների ամբողջական ազատությունն էր և ճանաչողական գործունեությունը։ Ըստ այդմ, աշակերտները դասարանում բաժանվում են խմբերի և ընտրում նախապես հայտնի զբաղմունքներից կամ ուսումնական թեմաներից որևէ մեկը, իսկ ուսուցիչը միայն հետևում է խմբի աշխատանքին, անհրաժեշտության դեպքում խորհուրդներ տալիս և ստուգում նրանց աշխատանքի արդյունքները։ Կուզինեն տարբերակում էր դասավանդումը և ուսուցումը։ Նրա մեթոդը թույլ էր տալիս երեխաներին ապրել, շփվել, աշխատել խմբում, զարգացնել նպատակասլացություն, համբերություն և նախաձեռնողականություն։

Խմբային աշխատանքի մեթոդը

Խմբային աշխատանքի մեթոդը ներառում էր հետևյալ տարրերը․

Առարկաների հետազոտում, նյութերի ուսումնասիրություն և ստացված արդյունքների գրանցում խմբի գրատախտակի վրա։
Աշխատանքի արդյունքը ցույց է տրվում ուսուցչին։ Ստուգելով աշխատանքը՝ նա առաջնորդվում է հետևյալ քայլերի հաջորդականությամբ՝ սկզբում ասում է, որ տեքստում կան ուղղագրական (կամ այլ քերականական) սխալներ, հանձնարարում ինքնուրույն գտնել և ուղղել դրանք, ապա անհրաժեշտության դեպքում կրկին ստուգում է տեքստը՝ այս անգամ ընդգծելով քերականական սխալները, այնուհետև, դարձյալ անհրաժեշտության դեպքում, հենց ինքն է սխալներն ուղղում առանց բացատրություն տալու (եթե, իհարկե, երեխաներն իրենք չխնդրեն)։
Աշխատանքը արտագրում են խմբի տետրի մեջ, և եթե կարիքը կա, կրկին ցույց տալիս ուսուցչին։
Կատարված աշխատանքը դասակրգվում է հատուկ քարտերի վրա։

Նման վարժությունները պարբերաբար կրկնվում են, և այդպիսով երեխաները նախօրոք ծանոթանում են թեմային և սովորում են ճիշտ դասակարգել։

Մեթոդները

Կուզինեն առանձնահատուկ ուշադրություն է դարձնում պատմության դասավանդման մեթոդին։ Նրա կարծիքով, պատմությունն այն տեսքով, որով մատուցվում է, ոչ միայն վնասակար է, այլև ոչ ընկալելի։ Ըստ մանկավարժի՝ երեխաներին ավելի շատ հետաքրքում է իրերի ու երևույթների էվոլյուցիան։ Կուզինեն իրերի պատմության մի ամբողջական ցանկ կազմեց՝ ներառելով դրա մեջ հագուստի, տրանսպորտի և հաղորդակցության, կրթության, գյուղատնտեսության, գործարարության պատմության մասին զանազան թեմաներ։

«Իմ մեթոդը թույլ է տալիս երեխաներին սովորել բառիս բուն իմաստով, այլ ոչ թե լինել սովորեցվողի դերում»։

- Ռոժե Կուզինե

Գրքեր

Roger Cousinet : la promotion d’une autre école, textes réunis par Suzanne Saisse et Marie de Vals, Éditions Érès, coll. « Connaissances de d'éducation », 2002, 150 p. 2-7492-0073-3
Roger Cousinet, un philosophe à l'épreuve de la pédagogie, textes choisis et présentés par Dominique Ottavi et Laurent Gutierrez, Institut national de recherche pédagogique, coll. « Bibliothèque philosophique de l'éducation », 2007, XVIII-110 p. 978-2-7342-1055-9
Laurent Gutierrez, « L'Oiseau bleu : histoire d'une revue rédigée par des enfants pour des enfants (1922-1929) », in Revue Le Télémaque, N32, 2007

Աշխատությունները

Une méthode de travail libre par groupes, Ed. du Cerf, 1945
Une méthode de travail libre par groupes (réédition avec une préface de Laurent Gutierrez (p. 9 à 34) sur le parcours de l'auteur), Ed. Fabert, 2011
La vie sociale de l’enfant, Scarabée, 1950
L’éducation nouvelle, Delachaux et Niestlé, 1950
Fais ce que je te dis, Scarabée, 1950
La formation de l'éducateur, PUF, 1952

Ծանոթագրություններ

↑ ^1,0 ^1,1 ^1,2 ^1,3 ^1,4 Identifiants et Référentiels (ֆր.) — ABES, 2011.
↑ ^2,0 ^2,1 ^2,2 ^2,3 ^2,4 Բրոքհաուզի հանրագիտարան (գերմ.)
↑ ^3,0 ^3,1 ^3,2 ^3,3 ^3,4 ծննդական
↑ ^4,0 ^4,1 ^4,2 ^4,3 ^4,4 ^4,5 մահվան վկայական — P. 5.
↑ Bibliothèque nationale de France data.bnf.fr (ֆր.): տվյալների բաց շտեմարան — 2011.

Արտաքին հղումներ

École la Source (fondée par Roger Cousinet)

Վիքիպահեստն ունի նյութեր, որոնք վերաբերում են «Ռոժե Կուզինե» հոդվածին։

[_575a80b763579bca-1] 1,0 ^1,1 ^1,2 ^1,3 ^1,4 Identifiants et Référentiels (ֆր.) — ABES, 2011.

[_743f33cb80395be8-2] 2,0 ^2,1 ^2,2 ^2,3 ^2,4 Բրոքհաուզի հանրագիտարան (գերմ.)

[_1a24d17a91d5a682-3] 3,0 ^3,1 ^3,2 ^3,3 ^3,4 ծննդական

[_163b6c3b67897eb1-4] 4,0 ^4,1 ^4,2 ^4,3 ^4,4 ^4,5 մահվան վկայական — P. 5.

[_bfcc79adadb6ad9b-5] Bibliothèque nationale de France data.bnf.fr (ֆր.): տվյալների բաց շտեմարան — 2011.

[1]