Զարմանահրաշ փղիկ

Զարմանահրաշ փղիկ (լատին․՝ Baris mirifica), փղիկների կամ երկարակնճիթների ընտանիքին պատկանող միջատ, որը գրանցված է Հայաստանի Հանրապետության Կարմիր գրքում։

3 մմ երկարությամբ փոքր չափի բզեզ է։ Բավականին նեղ և զուգահեռակող մարմինը ծածկված է խիտ թեփուկներով, որոնք լրիվ թաքցնում են ծածկույթները և ստեղծում սևադարչնագույն, կարմրադարչնագույն և սպիտակ բծերից կազմված լավ արտահայտված նախշ^[1]։

Հայաստանի էնդեմիկ տեսակ է։ Հայտնի է միայն Նուբարաշեն ավանի շրջակայքից (Երևան քաղաքի հարավարևելյան ծայրամաս)^[1]։

Ապրում է կարմիր ավազներով անապատներում, հանդիպում՝ մայիսին և հունիսի սկզբին^[1]։

Սահմանափակ արեալով հազվագյուտ տեսակ է։ Բնության պահպանության միջազգային միության Կարմիր ցուցակի չափորոշիչներով գնահատվում է որպես կրիտիկական վիճակում գտնվող տեսակ։

Թվաքանակը մեծաքանակ չէ, հանդիպում է եզակի առանձնյակներով։

Սպառնացող վտանգներից են քաղաքակենտրոնացումը և հողերի գյուղատնտեսական յուրացումը։

Պահպանության միջոցառումներ չեն իրականացվում^[1]։