Արմեն Վարդանյան (գնդապետ)

Արմեն Վարդանյան
սեպտեմբերի 21, 1974(1974-09-21) - նոյեմբերի 7, 2020(2020-11-07) (46 տարեկան)
Ծննդավայր	Վաղարշապատ, Էջմիածնի շրջան, Հայկական ԽՍՀ, ԽՍՀՄ
Մահվան վայր	Շուշի, Շուշիի շրջան, Արցախ
Քաղաքացիություն	Հայաստան
Կոչում	ոստիկանության գնդապետ
Պաշտոն	Հայաստանի ոստիկանության զորքերի հասարակական կարգի պահպանության գնդի հրամանատար (2018-2020)
Մարտեր/ պատերազմներ	Արցախյան ազատամարտ, Ապրիլյան պատերազմ (2016), 44-օրյա պատերազմ
Կրթություն	Հունաստանի ռազմական ակադեմիա (1999) և Ռուսաստանի Դաշնության պաշտպանության նախարարության ռազմական համալսարան (2009)
Պարգևներ	և

Արմեն Մամիկոնի Վարդանյան (սեպտեմբերի 21, 1974(1974-09-21), Վաղարշապատ, Էջմիածնի շրջան, Հայկական ԽՍՀ, ԽՍՀՄ - նոյեմբերի 7, 2020(2020-11-07), Շուշի, Շուշիի շրջան, Արցախ), հայ ռազմական և իրավապահ մարմինների գործիչ, Հայաստանի ոստիկանության զորքերի գլխավոր վարչության շտաբի պետի տեղակալ-օպերատիվ բաժնի պետ (2018), հասարակական կարգի պահպանության գնդի հրամանատար (2018-2020), ոստիկանության գնդապետ, 44-օրյա պատերազմի մասնակից, Հայաստանի «Մարտական խաչ» 1-ին աստիճանի^[1][2] և Արցախի «Մարտական խաչ» 1-ին աստիճանի շքանշանակիր^[3][4]:

Արմեն Վարդանյանը ծնվել է 1974 թվականի սեպտեմբերի 21-ին Էջմիածին քաղաքում^[3][4]: 1991 թվականին ավարտել է Վաղարշապատի Խաչատուր Աբովյանի անվան թիվ 4 միջնակարգ դպրոցը^[3][4]: 1991 թվականին ընդունվել է Երևանի «Գլաձոր» համալսարան:

Կիսատ թողնելով ուսումը 1993 թվականին զորակոչվել է պարտադիր ժամկետային ծառայության՝ Հայաստանի զինված ուժերում, ծառայել Տավուշի մարզի Կոթի գյուղի զորամասում^[3][4]: 1994 թվականին ընդունվել և 1999 թվականին ավարտել է Հունաստանի ռազմական ակադեմիան^[3][4]: 1999 թվականից անցել է ծառայության Հայաստանի զինված ուժերի № զորամասում, որտեղ զբաղեցրել է դասակի, վաշտի հրամանատարի, գումարտակի հրամանատարի տեղակալի և գումարտակի հրամանատարի պաշտոններ^[3][4]: 2001 թվականին գործուղվել է Հունաստանի հատուկ նշանակության զորքերի պատրաստման կենտրոն, մասնակցել մեկամսյա դասընթացի: 2002 թվականին Հունաստանում մասնակցել է խաղաղապահ զորքերի գործողությունների ուսուցման կենտրոնում կազմակերպված պարապմունքներին: 2007-2009 թվականներին սովորել է ՌԴ ՊՆ համազորային ակադեմիայում, այնուհետև ծառայությունը շարունակել է ՀՀ ՊՆ № զորամասում, որտեղ զբաղեցրել է գումարտակի հրամանատարի պաշտոնը, որից հետո հրամանատարի մարտական պատրաստության գծով տեղակալի պաշտոնը^[3][4]։

2012-2018 թվականներին ծառայության է անցել Հայաստանի ոստիկանության զորքերի հասարակական կարգի պահպանության գնդում (№1033 զորամաս) որպես հրամանատարի առաջին տեղակալ-շտաբի պետ^[3][4]: 2018 թվականի մարտի 26-ին նշանակվել է Հայաստանի ոստիկանության զորքերի գլխավոր վարչության շտաբի պետի տեղակալ-օպերատիվ բաժնի պետ^[3][4]: 2018 թվականի հուլիսի 27-ից զբաղեցնում էր Հայաստանի ոստիկանության զորքերի հասարակական կարգի պահպանության գնդի հրամանատարի պաշտոնը^[3][4]:

1993-1994 թվականներին ծառայելով Հայաստանի զինված ուժերում՝ մասնակցել է Տավուշի մարզի պաշտպանական մարտերին^[4]:

2016 թվականի ապրիլյան քառօրյա պատերազմի ժամանակ զորամասի անձնակազմի հետ, որպես գնդի հրամանատարի առաջին տեղակալ-շտաբի պետ մասնակցել է Արցախի Մարտակերտի շրջանում գտնվող Սարսանգի ջրամբարի պաշտպանությանը^[4]:

2018 թվականից մինչև 2020 թվականը, որպես ոստիկանության զորքերի զորամասի հրամանատար, Արմեն Վարդանյանն իր ենթակա ստորաբաժանումով մարտական հերթապահություն է իրականացնում Հայաստանի պետական սահմանին՝ Տավուշի մարզում^[4]:

2020 թվականի սեպտեմբերի 29-ից՝ իր ենթակա զորամասի հետ միասին միացել է 44-օրյա պատերազմի մարտական գործողություններին, մասնակցել` Քարվաճառի, Հաթերքի և Շուշիի պաշտպանական մարտերին<sup>[4]</sup>: 2020 թվականի նոյեմբերի 4-ից ղեկավարել է Շուշիի շրջանի Քարինտակ գյուղից մինչև Լիսագոր գնացող ավտոճանապարհի հատվածում ադրբեջանական դիվերսիոն խմբերի դեմ պայքարը<sup>[4]</sup>: Գտնվելով առաջնագծում և հմտորեն ղեկավարելով մարտը, իր ենթակաների հետ ետ է շպրտել ադրբեջանական զինված ուժերին՝ պատճառելով մարդկային և զինտեխնիկական մեծաթիվ կորուստներ<sup>[4]</sup>: Նոյեմբերի 5-ից իր անձնակազմի հետ գտնվելով շրջափակման մեջ` շարունակել է մարտը Շուշիի պաշտպանության համար^[4]: Նոյեմբերի 7-ին, երբ արդեն գերակշռող արդբեջանական զինված ուժերը մտել էին Շուշիի հարակից անտառները և փակել ավտոճանապարհը, ընդհանուր նահանջ հրամանի ժամանակ մնացել է առաջնագծում և շարունակել մարտ վարելը` ապահովելով ողջ մնացածների և վիրավորների նահանջը^[4]: Զոհվել է նույն օրը՝ նոյեմբերի 7-ին, Շուշիի մատույցներում^[3][4]։

Արմեն Վարդանյանի զինվորական կարգով հրաժեշտ տալու արարողությունը տեղի է ունեցել 2021 թվականի հունվարի 31-ին, ոստիկանության զորքերի զորամասում, իսկ հուղարկավորությունը` փետրվարի 1-ին, Վաղարշապատի քաղաքային գերեզմանատանը^[3]։

2021 թվականի սեպտեմբերի 21-ին՝ Արմեն Վարդանյանի ծննդյան օրը, նրա ծննդավայր Վաղարշապատում տեղի ունեցան հիշատակի և ոգեկոչման միջոցառումներ, որոնք մեկնարկեցին Վաղարշապատի համայնքապետարանի հարակից հերոսների պուրակից^[5]: Այնուհետև, միջոցառումը շարունակվեց համայնքապետարանում, որտեղ ներկաները դիտեցին Արմեն Վարդանյանի կյանքի ու գործունեության մասին պատմող ոստիկանության հասարակայնության հետ կապի և լրատվության վարչության պատրաստած տեսաֆիլմը^[5]։

Ամուսնացած էր, ունի մեկ որդի և երկու դուստր^[3]: Ազգականն է՝ Հայաստանի առողջապահության նախարար Անահիտ Ավանեսյանը^[4]:

Ծառայության ընթացքում արժանացել է մի շարք շքանշանների և մեդալների, ինչպես նաև բազմաթիվ պատվոգրերի և շնորհակալագրերի^[3]։^[4]

• Հայաստանի նախագահի կողմից արժանացել է «Մարտական ծառայության» և «Հասարակական կարգի գերազանց ապահովման համար» մեդալներով^[3]:
• Հայաստանի պաշտպանության նախարարության կողմից արժանացել է՝ «Գարեգին Նժդեհ», «Անբասիր ծառայության համար» 1 և 2 աստիճանի մեդալներով ինչպես նաև «ՀՀ զինված ուժեր 20-ամյակ» հոբելյանական մեդալով:
• Հայաստանի ոստիկանության պետի կողմից պարգևատրվել է՝ «Ոստիկանությունում երկարամյա ծառայության համար» 1-ին, 2-րդ և 3-րդ աստիճանի մեդալներով, «Օրենքի պատվար» մեդալով, «Ոստիկանության զորքերում գերազանց ծառայության համար» 1-ին աստիճանի կրծքանշանով, «Ոստիկանության 100-ամյակ» հոբելյանական մեդալով:
• Արցախի ոստիկանության պետի կողմից պարգևատրվել է «Համագործակցության ամարապնդման համար» մեդալով և «Մայրական երախտագիտություն Արցախի քաջորդիներին» հուշամեդալով:
• Հայաստանի ոստիկանության պետի կողմից հետմահու պարգևատրվել է «Սխրագործության համար» մեդալով:
• Արցախի նախագահի կողմից հետմահու պարգատրվել է «Մարտական խաչ» 1-ին աստիճանի շքանշանով:
• 2021 թվականի սեպտեմբերի 20-ին, Հայաստանի նախագահի հրամանագրով արժանացել է «Մարտական խաչ» 1-ին աստիճանի շքանշանով^[1][2]: