Գրիգոր Տեր-Մեսրոպյան
| Գրիգոր Տեր-Մեսրոպյան | |
|---|---|
| Ծնվել է | 1910 |
| Ծննդավայր | Կարս, Կարսի մարզ, Կովկասյան երկրամաս, Ռուսական կայսրություն |
| Մահացել է | 1977 |
| Մահվան վայր | Երևան, Հայկական ԽՍՀ, ԽՍՀՄ |
| Քաղաքացիություն |  Ռուսական կայսրություն և  ԽՍՀՄ |
| Կրթություն | Երևանի պետական համալսարան |
| Մասնագիտություն | երկրաբան |
| Պարգևներ և մրցանակներ |  |
| Երեխաներ | Արմեն Տեր-Մեսրոպյան և Թադևոս Տեր-Մեսրոպյան |
Գրիգոր Թադևոսի Տեր-Մեսրոպյան (1910, Կարս, Կարսի մարզ, Կովկասյան երկրամաս, Ռուսական կայսրություն - 1977, Երևան, Հայկական ԽՍՀ, ԽՍՀՄ), հայ երկրաբան։ ՀԽՍՀ վաստակավոր երկրաբան (1969)։
Կենսագրություն
Ծնվել է Կարսում (Ռուսական կայսրություն) 1910 թվականին, հոգևորականի ընտանիքում։ 1934 թվականին ավարտել է Երևանի երկրաբանահետախուզական տեխնիկումը։ Նույն թվականին ընդունվել է Երևանի պետական համալսարանի երկրաբանության ֆակուլտետը։ 1938 թվականին համալսարանն ավարտելուց հետո աշխատանքի է անցել Հայկական երկրաբանական վարչությունում։ Աշխատանքի ընթացքում որպես երկրաբան և երկրաբանահետախուզական խմբերի ղեկավար մասնակցել է Հայկական ԽՍՀ տարածքում գործող բազմաթիվ հանքավայրերի՝ ֆոսֆորիտի, պեմզայի, գիպսի, տուֆի, կավի, պիրիտի, կրաքարի և այլ հանքատեսակերի ուսումնասիրությանը և հետազոտմանը։ Այդ մասին նա գրել է բազմաթիվ ակնարկներ և զեկույցներ[1]։
1964 թվականին ակադեմիկոս Կոնստանտին Պաֆֆենհոլցի հետ համատեղ Տեր-Մեսրոպյանը գրել է Արագածի հրաբխային զանգվածի մասին «Արագած» երկրաբանական ակնարկը (ՀԽՍՀ ԳԱ հրատարակչություն)։
Մահացել է Երևան քաղաքում 1977 թվականին[1]։
Նվաճումներ և պարգևներ
Երկրաբանական ծառայության համակարգում երկարամյա և անբասիր աշխատանքի համար պարգևատրվել է պատվոգրերով և մեդալներով՝
- «Կովկասի հերոսական պաշտպանությանը մասնակցելու համար» մեդալ,
- «1941-1945 թվականների Երկրորդ համաշխարհային պատերազմում անբասիր աշխատանքի համար» մեդալ,
- «Աշխատանքային ձեռքբերումների համար» մեդալ,
- «Անբասիր աշխատանքի համար, ի նշանավորում Վ. Ի․ Լենինի ծննդյան 100-ամյակի» մեդալ,
- «Հայրենական մեծ պատերազմում տարած հաղթանակի 30 տարի» մեդալ,
- ՀԽՍՀ Գերագույն խորհրդի «Սոցիալիստական մրցության գերազանցիկ» պատվոգիր,
- ԽՍՀՄ երկրաբանության նախարարության պատվոգիր,
- ՀԽՍՀ Մինիստրների խորհրդի երկրաբանության վարչության պատվոգիր,
- ՀԽՍՀ վաստակավոր երկրաբան (1969),
- Աշխատանքի վետերան մեդալ (1970)։
Ընտանիք
Ունեցել է երեք երեխա՝ Թադևոս, Գայանե և Արմեն։