Wbohow (Šěrachow-Korzym)

Wbohow
Halbendorf/Gebirge

DEC
město:	Šěrachow-Korzym
zagmejnowanje:	1973 (do Chróstawy)
wobydlerstwo:	128 (9. meje 2011)[1]
wysokosć:	249 metrow n.m.hł.
51.09805555555614.4675249 Koordinaty: 51° 5′ 53″ S, 14° 28′ 3″ W
póstowe čisło:	02681
předwólba:	035877
wotwodźene słowa:	wobydler/ka: Wbohowčan/-ka adjektiw: Wbohowski skłonowanje: Wbohowa, Wbohowej, Wbohow, Wbohowom, we Wbohowje
Chěža ze stołom při Budyskej dróze
wikidata: Wbohow (Q1570307)

Wbohow (němsce Halbendorf/Gebirge) je hornjołužiska wjes ze 128 wobydlerjemi,^[2] kotraž słuša k městu Šěrachow-Korzym.

Wjes leži mjez prěnim a druhim rjećazom Hornjołužiskich horin na wuchodnym boku sprjewineho doła, něhdźe dźesać kilometrow južnje Budyšina a štyri kilometry sewjerowuchodnje Šěrachowa. Susodne sydlišća su Wuhančicy-Koblica a Kumwałd na wuchodźe, Carlsberg a Chróstawa na juhu, Bjedrusk na zapadźe a Jiłocy na sewjerozapadźe.

We wokolinje wsy su so germanske a słowjanske črjopy z 13. lětstotka namakali. Hižo tehdy wjedźeše wikowanski puć mjez Budyšinom a Žitawu přez dźensnišu wsu a dale přez sedło Wjerbjež do juha. Prěnje naspomnjenje wsy sameje jako Halbindorff sta so potom w lěće 1460.^[3] W lěće 1572 naspomni so tamniše ryćerkubło, kotrež měješe ležownostne knjejstwo we Wbohowje a někotrych susodnych wjeskach. W lěće 1936 zagmejnowa so sewjernje železnicy ležacy Supow, tak zo měješe Wbohowska gmejna na započatku Druheje swětoweje wójny nimale 300 wobydlerjow. Dnja 1. januara 1973 so wona do Chróstawy zagmejnowa.

We wsy steji póštowy stołp, kotryž bu hižo do lěta 1800 nastajeny.

Po Arnošta Mukowej statistice wo serbskej ludnosći we Łužicy měješe Wbohow w lěće 1884 cyłkownje 172 wobydlerjow, z nich 127 Němcow (74 %) a 45 Serbow (26 %).^[4] W susodnym Supowje bě wot 27 wobydlerjow hišće 14 serbskich. Gmejna ležeše tehdy hišće na samej južnej kromje serbskeho rěčneho ruma. Arnošt Černik liči w lěće 1956 w cyłej gmejnje jenož hišće šěsć Serbow.

Wbohow nima swójsku cyrkwju, tak zo su protestantiscy wobydlerjow wot 17. lětstotka na tři susodne wosady rozdźělene, a to na Budestečansku (něhdyši serbski podźěl ludnosće), Chróstawsku a Kumwałdsku.

Přez Wbohow wjedźe zwjazkowa dróha 96 (Budyšin–Žitawa), stara kejžorska dróha. Wot lěta 1890 měješe Wbohow swójske zastanišćo při železniskej čarje Budestecy–Kumwałd a wot 1928 sahaše čara samo hač do Lubija. W lěće 1997 bu wona zawrjena a 2008 wottwarjena.

1. ↑ staw: 9. meje 2011; Wuslědki censusa 2011 za Šěrachow-Korzym
2. ↑ staw: 9. meje 2011; Wuslědki censusa 2011 za Šěrachow-Korzym
3. ↑ Wbohow w Digitalnym stawizniskim zapisu městnow Sakskeje (němsce)
4. ↑ Ernst Tschernik: Die Entwicklung der sorbischen Bevölkerung. Akademie-Verlag, Berlin 1954, str. 54. → wšě wjeski

 Commons: Wbohow – Zběrka wobrazow, widejow a awdiodatajow