Vicente Gómez Umpiérrez

Vicente Gómez Umpiérrez

(2015)
Biografía
Nacemento	31 de agosto de 1988 (36 anos) As Palmas de Gran Canaria, España
Altura	187 cm
Peso	77 kg
Actividade
Ocupación	futbolista
Período de actividade	2008 -
Deporte	fútbol
Posición de xogo	Centrocampista
Número deportivo	4
Traxectoria   Equipo –   Deportivo da Coruña 2007–2009 AD Huracán 2010–   UD Las Palmas

Vicente Gómez Umpiérrez, nado nas Palmas de Gran Canaria o 31 de agosto de 1988, é un exfutbolista español, que xogaba de centrocampista defensivo. Desenvolveu a maior parte da súa carreira na UD Las Palmas, coa que disputou un total de 242 partidos en oito tempadas.

Formouse como futbolista na canteira do Huracán, da súa cidade natal, As Palmas.^[1] Na tempada 2007/08 debutou co primeiro equipo na Rexional Preferente, logrando ese mesmo ano o ascenso á Terceira División.^[2] En 2009 ingresou na UD Las Palmas, e aínda que inicialmente contaba con ficha do equipo C, disputou a tempada 2009/10 co Las Palmas Atlético en Terceira, compartindo equipo con Jonathan Viera, Juanpe ou Vitolo entre outros.^[2]

Na tempada 2010/11 os catro subiron ao primeiro equipo, co que Vicente debutou nun partido da Copa do Rei ante o Valladolid. no que substituíu na segunda metade a Jorge Larena. Marcou o segundo gol canario naquel partido, aínda que o seu equipo acabou perdendo por 5-3.^[3] Xogou un total de oito tempadas no primeiro equipo amarelo, conseguindo o ascenso á Primeira División na 2014/15. Debutou na máxima categoría na xornada inaugural da tempada 2015/16, nunha derrota pola mínima ante o Atlético de Madrid no antigo Vicente Calderón, saltando ao terreo de xogo na segunda parte no lugar de Hernán.^[4]

En agosto de 2018, despois do descenso a Segunda, deixou a UD Las Palmas e fichou polo Deportivo da Coruña, que tamén acababa de baixar á división de prata. O seu balance no club canario foi de 242 partidos oficiais e 15 goles.

O seu traspaso pechouse nunha cantidade superior ao medio millón de euros e asinou un contrato por tres tempadas.^[5][6] O seu debut produciuse na segunda xornada da tempada 2018/19, xogando como titular nunha vitoria a domicilio fronte o Extremadura UD (0-1). Disputou un total de 34 partidos durante a campaña, 24 deles como titular, e participou nos catro encontros da promoción de ascenso, onde o seu equipo acabou caendo na final ante o Mallorca.^[7] A súa participación diminuíu na seguinte campaña, disputando 26 partidos, con 15 titularidades, nunha nefasta tempada do Deportivo, que consumou o descenso á Segunda División B por segunda vez na súa historia.

En setembro de 2020 mudouse á India, onde asinou como novo xogador do Kerala Blasters, da Superliga do país asiático.^[8] No club de Kochi coincidiu con outros xogadores estranxeiros como Bakary Koné, Gary Hooper ou os españois Juande e Sergio Cidoncha, rematando a liga na penúltima posición. Para a seguinte tempada regresou a Europa, fichando polo Xanthi, da segunda división grega, co que disputou 31 partidos, marcando 4 goles.

En xaneiro de 2023, despois de varios meses sen equipo, anunciou a súa retirada definitiva dos campos de fútbol, incorporándose como observador ao Las Palmas.^[9]

• Perfil en BDFutbol.com (en inglés)