Miruts Yifter

Cadro de medallas
Atletismo masculino
Xogos Olímpicos
Xogos Panafricanos

Miruts Yifter
	;
Biografía
Nacemento	15 de maio de 1944 ; Adigrat, Etiopía (en)
Morte	22 de decembro de 2016 (72 anos); Toronto, Canadá
Causa da morte	doenza cardiovascular
Altura	162 cm
Peso	53 kg
Actividade
Ocupación	fondista
Deporte	atletismo
Disciplina deportiva	carreira de longa distancia
Participou en
1980	Xogos Olímpicos de 1980
1972	Xogos Olímpicos de 1972
Descrito pola fonte	Africa: An Encyclopedic Reference (en) , (vol:1)

Miruts Yifter, nado o 15 de maio de 1944 en Adigrat, rexión de Tigray (Etiopía), é un corredor etíope de longa distancia, que gañou as probas de 5.000 e 10.000 metros nos Xogos Olímpicos de Moscova. Debido ao seu poderoso cambio de ritmo nos metros finais, era alcumado "Yifter the Shifter", que quere dicir algo así como Yifter "o cambiador".

De orixe humilde, na súa xuventude adicouse a diversos oficios: operario nunha fábrica, condutor de carruaxes... Máis tarde alistouse no Exército, e alí foi onde descubriron o seu talento para o atletismo.

O seu debut nos Xogos Olímpicos tivo lugar nos Xogos Olímpicos de Múnic, onde gañou a medalla de bronce nos 10.000 metros, nunha proba gañada polo finlandés Lasse Virén, e onde este bateu o récord mundial.

Tamén ía participar nos 5.000 metros, pero non se presentou na liña de saída da súa serie clasificadora por motivos que aínda hoxe son confusos.

Catro anos máis tarde non puido participar na Olimpíada de Montreal, a causa do boicot da maioría de nacións africanas, incluída Etiopía, a estes Xogos.

Na 1ª edición do Campionato do Mundo de Atletismo celebrado en Düsseldorf en 1977, conseguiu a vitoria tanto en 5.000 como en 10.000 metros. Repetiría esta dupla vitoria na seguinte edición, en Montreal 1979.

O acontecemento máis importante da súa carreira deportiva foron os Xogos Olímpicos de Moscova. Na final dos 10.000 metros lanzou o seu ataque a falta de 300 metros e conseguiu a vitoria con 27:42 por diante do finlandés Kaarlo Maaninka (prata) e o tamén etíope Mohamed Kedir (bronce).

Cinco días máis tarde, na final dos 5.000 metros, tivo moita máis resistencia, especialmente por parte do tanzano Suleiman Nyambui, a quen derrotou nos últimos metros da proba e realizou unha marca de 13:21, un novo récord olímpico. O bronce foi para o finlandés Kaarlo Maaninka, que fora prata nos 10.000 m.

Deste xeito, Yifter convertíase no quinto home na historia en gañar os 5.000 e os 10.000 metros nuns Xogos Olímpicos, tras Hannes Kolehmainen en 1912, Emil Zátopek en 1952, Vladimir Kuts en 1956, e Lasse Virén en 1972 e 1976.

Unha das controversias que se presentou durante os Xogos Olímpicos de Moscova tiña que ver coa verdadeira idade de Miruts Yifter, o que contribuíu a rodear dun halo de misterio a este corredor. Había algúns que dicían que nacera en 1938 e que polo tanto contaba xa con 42 anos, pero outros rebaixaban esa cifra a 33. O propio Yifter nunca aclarou de forma definitiva estas dúbidas. Cando uns xornalistas lle preguntaron, el respondeu o seguinte: "Men may steal my chickens; men may steal my sheep. But no man can steal my age"

Na actualidade a versión máis aceptada sobre a súa data de nacemento é o 15 de maio de 1944, polo que tería 36 anos cando participou en Moscova.

Tralos Xogos non volveu conseguir nada destacable e retirouse en 1981.

Ligazóns externas

www.olympic.org