Arnoglossus imperialis

Arnoglossus capensis Rapapelos, rapapelos imperial
Estado de conservación
Pouco preocupante
Clasificación científica
Reino: Animalia Filo: Chordata Subfilo: Vertebrata Clase: Actinopterygii Subclase: Neopterygii Infraclase: Teleostei Superorde: Acanthopterygii Orde: Pleuronectiformes Suborde: Pleuronectoidei Familia: Bothidae Xénero: Arnoglossus Especie: A. imperialis
Nome binomial
Arnoglossus imperialis (Rafinesque, 1810) [1]

Arnoglossus imperialis é unha especie de peixe teleósteo da orde dos pleuronectiformes, suborde dos pleuronectoideos e familia dos bótidos,^[1] coñecida en galego como rapapelos^[2] ou rapapelos imperial.^[3]

A especie foi descrita por primeira vez en 1810 polo naturalista estadounidense de orixe franco-xermana-italiana Constantine Samuel Rafinesque, co nome de Bothus imperialis.^[1]

Ademais de por este nome orixinario, coñécese tamén polos sinónimos:^[1]

• Arnoglossus blachei Stauch, 1965
• Arnoglossus lophotes Günther, 1862
• Charybdia rhomboidichthys Facciolà, 1885

As principais características morfolóxicas desta especie son:^[2][4]

• Corpo ovalado, moi deprimido, de até os 25 cm de lonxitude como máximo.
• Ollos grandes e moi próximos, separados por unha crista ósea moi aparente. O ollo anterior está un pouco atrasado con respecto ao inferior.
• Boca armada con dentes diminutos, case todos do mesmo tamaño.
• Aleta dorsal con de 94 a 106 raios (brandos), e a anal con de 74 a 82 raios (igualmente brandos).
• Do segundo ao sétimo raios da aleta dorsal dos machos son notabelmente máis grosos e logos que os outros, formando unha especie de crista; nas femias esta crista é menos conspicua (e, ademais, está formada só polos raios do segundo ao sexto).
• As aletas pelvianas do lado pigmentado presentan unha pequena mancha negra na parte posterior; os raios destas aletas son máis longos nos machos.
• O pedúnculo caudal é case inexistente, e a aleta caudal é arredondada.
• Coloración, no lado pigmentado, amarela agrisada máis ou menos escura, con numerosas manchas máis escuras, pardas.

Hábitat

É unha especie mariña, demersal, que vive a profundidades de entre os 10 e os 350 m (usualmente, entre os 40 – 200 m), sobre fondos areosos, lamacentos e con cunchas e corais.^[2][4]

Distribución

Distribúese polas costas do Atlántico oriental entre os 58° N e os 29° S,e entre os 19° W e os 16° E, desde Escocia até Namibia, incluíndo o mar Mediterráneo, sendo especialmente abundante na súa metade occidental.^[4] Tamén nas costas de todas as illas dentro destas coordenadas.

Nutrición

Aliméntase de pequenos peixes e invertebrados bentónicos.^[2] Segundo Jardas e Pallaoro, a súa dieta no Adriático está constituída basicamente por vermes poliquetos, aínda que, como moitas das especies do seu xénero, probabelmente consome principalmente crustáceos bentónicos.^[5]

Reprodución

Reprodúcese en primavera.^[2]

O rapapelos do Cabo é un peixe comestíbel, pescándose activamente nas zonas onde vive.^[3] Captúrase con redes de arrastre peláxicas e de fondo.^[4]

O primeiro rexistro desta especie en Galicia fíxoo De Buen en 1935, no seu traballo "Fauna ictiológica. Catálogo de los peces ibéricos de la planicie continental, aguas dulces, pelágicos y de los abismos próximos, I parte", Not. y Res. Inst. Esp. Ocean. 82: 89-148. Posteriormente foi rexistrado en numerosas ocasións.^[2]

A Unión Internacional para a Conservación da Natureza e dos Recursos Naturais cualifica actualmente (2015) a situación da especie Arnoglossus capensis como LC (pouco preocupante) debido a que está amplamente distribuída e é común nas zonas da súa área de dispersión, ocupando ademais un número variado de hábitats, polo que é probábel que teña unha distribución relativamente continua. Porén, considera que, dado que a especie é capturada por frotas pesqueiras que operan dentro de toda a súa área, cumpriría facer investigacións adicionais para determinar o número de espécimes que deben capturarse para que non perigue o status das súas poboacións.^[6]

Wikimedia Commons ten máis contidos multimedia na categoría:  Arnoglossus imperialis

• Aldebert, Y.; M. Desoutter & J.-C. Quéro (1990): "Bothidae" en J. C. Quéro, J. C. Hureau, C. Karrer, A. Post & L. Saldanha (eds.) Check-list of the fishes of the eastern tropical Atlantic (CLOFETA). JNICT, Lisboa; SEI, París; & UNESCO, París. Vol. 2 pp. 1027-1036.
• Fenner, Robert M. (2001): The Conscientious Marine Aquarist. Neptune City, New Jersey, USA: T.F.H. Publications.
• Jardas, I. & Pallaoro, A. (1987): "A Contribution to the knowledge of the ichthyofauna of the Adriatic Sea: Arnoglossus imperialis (Rafinesque, 1810) (Heterosomata, Bothidae) a new species in the Adriatic Sea. Biljeske-Notes. Institut za oceanografiju i ribarstvo 69. Split, Croacia.
• Moyle, P. & J. Cech (2000): Fishes: An Introduction to Ichthyology, 4a. edición, Upper Saddle River, New Jersey, USA: Prentice-Hall.
• Nelson, Joseph S. (2006): Fishes of the World. Nova York: John Wiley & Sons, Inc. ISBN 0-471-25031-7.

• Pleuronectiformes
• Bótidos
• Arnoglossus

• Arnoglossus imperialis en Encyclopedia of Life (en inglés)