Andrés Palop

Andrés Palop

Nome orixinal	(es) Andrés Palop Cervera
Biografía
Nacemento	22 de outubro de 1973 (51 anos) L'Alcúdia, España
Outros nomes	La pantera de l'Alcúdia
Altura	184 cm
Peso	77 kg
Actividade
Ocupación	futbolista, adestrador de fútbol
Período de actividade	1995 - 2014
Deporte	fútbol
Posición de xogo	Gardameta
Traxectoria   Equipo 1993–1997   Valencia CF Mestalla 68 (0) 1997–1999 → cesión:    Villarreal Club de Fútbol 74 (0) 1997–2005   Valencia CF 43 (0) 2005–2013   Sevilla FC 217 (0) 2013–2014   Bayer Leverkusen 0 (0)   Selección nacional 2007–2008   España 0 (0)
Participou en
xuño de 2008	Eurocopa de Fútbol Austria/Suíza 2008
Sitio web	andrespalop.com

Andrés Palop Cervera, nado en L'Alcúdia (Valencia) o 22 de outubro de 1973, é un exfutbolista e actual adestrador de fútbol español. Xogaba de porteiro.

Formado na canteira do Valencia CF, a tempada 1997/98 foi cedido ao Villarreal CF, que por entón xogaba na Segunda División Española. Co submarino amarelo fixo historia, ao lograr esa tempada o ascenso a Primeira división, por primeira vez na súa historia. Na máxima categoría Palop seguiu defendendo a portería do Villarreal con notables actuacións. Ao termo da tempada e consumado o descenso vilarrealense, o Valencia CF decidiu fichalo de novo.

En Valencia permaneceu seis tempadas nas que o club cultivou múltiples éxitos (dúas ligas, unha Copa da UEFA, unha Supercopa de Europa e dous subcampionatos da Liga de Campións da UEFA). Con todo, Palop sempre estivo á sombra de Santiago Cañizares, e en seis anos só foi aliñado en 43 partidos de liga.

O verán de 2005 abandonou Valencia para incorporar ao Sevilla FC, onde axiña se converteu nun dos alicerces do equipo. Na súa primeira tempada conquistou a Copa da UEFA, o primeiro trofeo europeo na historia do club. O título reeditouse a seguinte tempada e Palop xogou un papel destacado. O 15 de marzo de 2007, Palop converteuse no heroe da xornada para o seu equipo, xa que este perdía 2-1 co Shakhtar Donetsk de Ucraína nos oitavos de final da Copa da UEFA e no tempo de desconto fixo o gol do empate rematando de cabeza un saque de esquina.^[1] Na final, xogada o 16 de maio de 2007 contra o RCD Espanyol, Palop converteuse unha vez máis no heroe do seu equipo ao parar tres lanzamentos durante a quenda de penaltis, na que o Sevilla FC se impuxo 3 penaltis a 1 tras concluír o tempo regulamentario co resultado de 1-1 e a prórroga con 2-2. Nese partido foi designado MVP do mesmo.^[2]

A tempada 2006/07 tamén conquistou a Supercopa de Europa e a Copa do Rei, ademais de terminar a liga en terceira posición, logo de pelexar durante toda a tempada polo título.

O día 19 de maio de 2010 logrou unha nova Copa do Rei co Sevilla FC tras imporse ao Atlético de Madrid no Camp Nou de Barcelona por 0-2. Como homenaxe a Antonio Puerta, decidiu pór a camiseta co número 16 para recoller a copa de mans do Príncipe Felipe.

En xuño de 2013 fichou polo Bayer Leverkusen por unha tempada.

O 20 de agosto de 2007 foi convocado por primeira vez pola Selección de fútbol de España como recambio de urxencia do lesionado Iker Casillas, con vistas a un partido amigable contra Grecia,^[3] aínda que non chegou a debutar.

Posteriormente foi incluído no combinado español que participou na Eurocopa 2008.^[4] Tras a vitoria na final, Palop vestiu a camiseta de Luís Miguel Arconada para recibir o trofeo, como homenaxe ao ex porteiro internacional cuxo fallo na final da Eurocopa 1984 supuxo a derrota española ante Francia,^[5] un xesto que emocionou a Arconada.^[6] Curiosamente, é campión de Europa coa Selección Española sen debutar, polo que non conta como internacional.

• Datos do xogador en bdfutbol.com (en castelán)
• Datos do xogador en transfermarkt.co.uk (en inglés)