Montagne

Cél articllo est ècrit en arpetan supradialèctâl / ORB lârge.

Por los articllos homonimos, vêde Montagne.

Por l’articllo en grafia de Confllens, vêde Moutanye.

Na montagne^[1],[2] est na fôrma topografica de relièf positif, qu’ègziste dessus la surface de planètes tèluriques, et qu’est dens un ensemblo — na chêna de montagnes — ou ben que fôrme un relièf tot solèt. El est caractèrisâye per son hôtior et, més g·ènèralament, per son hôtior a l’encant, vêr per sa penta. Portant ègziste gins de dèfenicion solèta de cen qu’est na montagne, tèrmo aparu entre-mié lo X^émo et lo XII^émo siècllo, et pués coègzistont tot plen de règ·ionalismos por dècrire les fôrmes de relièf. Pôt dèsignér a côp na bèca pentua et na simpla èlèvacion de tèrren, coment un molâr, atant que lo méten dedens son ensemblo. Les montagnes pregnont en èfèt de fôrmes brâvament difèrentes d’aprés los mècanismos que ménont a lor orog·enèse : dês les bârmes de mârges continentâles et los rifts en domêno èxtensif, tant qu’a les chênes de colision et pléssement, en passent per les fâses de subduccion que fât de volcans de tipo èxplosif en arcs ensulèros ou ben lo long de cordelyéres, sen oubliar lo volcanismo de pouent chôd de tipo èfusif ni les entrusions betâyes fôr per l’èrosion. Lo cllimat qu’enduront, avouéc des tempèratures en grôs més bâsses et des prècipitacions més importantes qu’en plana du fêt de l’hôtior, jouye asse-ben un rolo important dedens lor façonament. Avouéc l’isostasia, les montagnes cognessont de fenomènos de surrèccion et d’amincissement crustâl que ménont, prèst, a lor disparicion. Les més vielyes chênes de montagnes en Tèrra dâtont du Palèozoyico.

A côsa de lor cllimat spècefico, g·ènèralament marcâ per des plans d’hôtior, et pués de lors pentes mâlésiêes d’accès que rendont empossiblo n’èxplouètacion entensiva, les montagnes abritont na grant variètât d’ècosistèmos et pués n’importanta biodivèrsitât. Tot plen d’èspèces de bétyes y trôvont na prèssion ècologica muendra. De cél fêt, prés du tièrs de les zones protègiêes dedens lo mondo sè trôvont en montagne. Quand ben que seriant na sôrsa d’égoua doce endispensâbla, les zones de montagnes sont sovent considèrâyes coment rudes ou ben que demandont de compâres d’adaptacion importantes de la pârt de les populacions humènes.

Les montagnes, demores suposâyes de tot plen de divinitâts, ant grant-temps portâ crenta ux homos et pués réstont largement mècognues tant qu’a les premiéres ètudes scientifiques sèrioses u XVIII^émo siècllo. Dês cél temps, lor reprèsentacion artistica vint més rèalista. Aprés cen, sont la chousa de conquétes avouéc l’avènament de l’arpinismo. Sont u franc méten du dèvelopament de l’hidroèlèctricitât a la fin du XIX^émo siècllo. Dês adonc, més ésiêes d’accès, s’ôvront u tourismo, en premiér a celi des sports d’hivèrn, que bolevèrse sovent los cârros de les montagnes de les règ·ions tempèrâyes, mas étot en defôr de la sêson hivèrnâla a la veriê a pied et mémo u trekking, que la pratica est prôche de la natura.

1. ↑ (fr) Domenico Stich, « Francoprovençal. Proposition d’une orthographe supra-dialectale standardisée » [PDF], Tèsa de doctorat, Univèrsitât Paris-Sorbona, 2001, p. 1221 et pués 1492.
2. ↑ (fr) Domenico Stich - « Dictionnaire francoprovençal-français et français-francoprovençal », Tonon, Le Carré, 2003, p. 97 et pués 326.