Reims

Beauté, bonté, honneur et courtoisie,
Noble maintien, gent corps et noble atour,
Humble parler et belle compaignie
Pour festoier toutes genz de de valour,
Dames plaisans, garnies de doulçour,.
Qui tant faictes d'onneur a estrangiers,
De grans festes et de nobles mengiers,
Pour le depart dont je souspire et plaings,
Adieu te dy, noble cité de Rains.

Sur toutes dois avoir la seigneurie,
Et, quant a moy, je te donne m'amour;
Tu es du roy et du sacre embelie,
Et si aymes ton naturel seignour,
Ses genz aussi : mais tu porte la flour
De festoier et chanter voulentiers.
Dames, aies les cuer frans et entiers !
En merciant de cuer a jointes mains,
Adieu te dy, noble cité de Rains.

On mayne en toy tresnoble et bonne vie;
Du royaume es le droit cheif et l'onnour.
Si me fait mal de toy la departie,
Et n'aray bien jusques a mon retour;
Devers Saint Lié me suis mis en destour.
Et tant com j'ay peu veir ses clochiers
T'ay regardé, et par agenouilliers
Piteusement fu de dire contrains :
Adieu te dy, noble cité de Rains.