Tabakalera

Tabakalera
	[[]]
	Irudi gehiago
Kokapena
Herrialdea	Euskal Herria
Probintzia	Gipuzkoa
Udalerria	Donostia
Koordenatuak	43°19′00″N 1°58′33″W / 43.31658°N 1.97583°W
Historia eta erabilera
Irekiera	2015
Inaugurazioa	2015eko irailaren 11
Jabea	Donostiako Udala; Eusko Jaurlaritza; Gipuzkoako Foru Aldundia
Arkitektura
Arkitektoa	Mauro Serret Mirete (en)
Azalera	13.277 m²
Kontaktua
Helbidea	Plaza de las Cigarreras, 1
	Webgune ofiziala

Tabakalera, Donostian, Gipuzkoako hiriburuan, dagoen kultura garaikidearen nazioarteko gunea da. 1913-2003 artean tabako-fabrika izan zen.

Izena

Tabako-lantegia kudeatzen zuen enpresa espainiarrak Tabacalera zuen izena, eta hedaduraz, eraikinak berak ere enpresaren izena hartu zuen. Donostiako Kultura Garaikidearen Nazioarteko Guneak berak Tabakalera esaten dio etxeari, K letrarekin, argitaratzen dituen idatzietan eta interneteko domeinuan (https://web.archive.org/web/20090323063116/http://www.tabakalera.eu/ tabakalera.eu).

Eraikinean etxea duen kultur instituzioari Donostiako Kultura Garaikidearen Nazioarteko Zentroa deritzo, KGNZ. Gaztelaniaz, Centro Internacional de Cultura Contemporánea de San Sebastián esaten zaio eta CICC siglak erabiltzen ditu erakunde horrek.

Kokalekua

Egia auzoan dago, Mandasko Dukearen pasealekua amaitu eta Mundaitz kalea hasten den lekuan, Atotxako dorrearen eta Kristina-enea parkearen artean. Eraikinaren atzealdea, Iparraldeko geltokira eta trenbidera, Donostiako autobus-geltokira eta Urumea ibaiaren inguruko pasealekura begira dago.

Historia

Tabako-fabrika

1913-2003 artean tabako-fabrika bat izan zen. XX. mendean zehar, Donostiako hiriguneko lantegi inportanteenetakoa izan zen Tabakalera, eta langile gehienak, emakumeak izaki, bizitza sozialean berebiziko garrantzia izan zuen.

Espainian tabako ekoizpena pribatizatu ondoren, Tabacalera enpresak izena aldatu zuen, Altadis izatera igaro zen, eta zortzi fabrika itxi zituen, horien artean Donostiakoa, 2003an. Urtebete geroago, Donostiako Udalak, Gipuzkoako Foru Aldundiak eta Eusko Jaurlaritzak erosi egin zuten eraikina. Erakunde horien arteko akordio baten ondoren, kultura-jardueretarako erabiltzea erabaki zuten eta propio sortutako erakunde berri baten egoitza bilakatu da: Donostiako Kultura Garaikidearen Nazioarteko Gunea da orain Tabakaleraren eginkizuna.

Tabakalera - Kultura Garaikidearen Nazioarteko Zentroa

Tabakalera kultura garaikideari eskainitako espazioa da. Jarduera-programa zabala eskaintzen du eta, aldi berean, [ps://www.tabakalera.eu/eu/sortzaileen-gunea ekoizpen-zentroa] ere bada. Sorkuntza eta ikuspuntu kritikoa lantzen dituen hezkuntza-programa eta erakusketak uztartzen ditu Tabakalerak.

Hainbat erakunde eta proiektuk dute egoitza Tabakalera eraikinean. Donostiako Zinemaldia, Kutxa Fundazioa, Etxepare Institutua, Zineuskadi, ..., Horiez gain, ekimen txiki pribatuak ere badira bertan.

Proiektua garatu bitartean eta eraikina eraberritzeko lanak egin bitartean, Tabakalerak, erakusketak, zikloak, eztabaidak, ..., antolatu zituen hainbat eragilerekin elkarlanean.

2007. urtean hasi zen Tabakalera bere programa garatzen. Urte horretan antolatu ziren, besteak beste, Free Electrons bideo-artelanen erakusketa eta Summer, Julian Schnabel, margolariaren erakusketa handia.

2008an DAROS bildumako lanak erakutsi zituzten Ez da neutrala erakusketan eta Tabako-fabrikaren historia gogoratu zuten Egiatik proiektuarekin.

2009an, Look Again bideo-artea oinarri duen erakusketa eta eraikina berritzeko aurkeztutako lanak ikusgai ipini zituen erakusketa izan ziren ikusgai. Gainera, Clermont-Ferrand film laburren nazioarteko jaialdiarekin elkarlanean LABO saila proiektatu zen Donostian bigarren urtez.

2010ean hasi ziren eraikina eginkizun berrietara moldatzeko lanak.

2015eko irailaren 11n ireki zituen ateak Tabakalera berrituak, kultura garaikidearen nazioarteko gune bilakatuta.