Aholatz bostbixar

Aholatz bostbixar
	Irudi gehiago
Iraute egoera
	; Arrisku txikia (IUCN 3.1)
Sailkapen zientifikoa
Erreinua	Animalia
Filuma	Chordata
Ordena	Gadiformes
Familia	Gadidae
Generoa	Ciliata
Espeziea	Ciliata mustela; Linnaeus, 1758

Aholatz bostbixarra (Ciliata mustela) Lotidae familiako ur gaziko arraina da, ipar-ekialdeko Ozeano Atlantikoan bizi dena^[1].

Ez du arrantza balio handirik.

Euskal izendegia

Aholatz bostbixarra izendatzeko izen asko daude Euskal Herrian, batzutan ophidion barbatumekin nahasturik^[2]:

Izena	Erabilera-eremua (udalerria)
aholatz bostbixarra^[3]
aingira-bizarra, aingira-bixarra^[2]	Mundaka
aingire-bixarra^[2]	Bermeo
aingira-matxo^[2]	Elantxobe
mustela^[4]
lamproye^[4]

Deskribapena

Aholatz bostbixarra 25 cm inguruko luzera duen arrain luzea da. 45 cm-ko aholatza ere aurkitu da. 3 urte arte bizi daiteke.

Gorputza ezkatarik gabeko azal bigunak estaltzen du. Bizkarraldeko bi hegats ditu, lehenengoa laburra, izpi batzuk baino ez, bigarren hegatsa aldiz oso luzea da. Hegats horrek hasieran arantza bat du eta ondoren erradio bigun ugari. Uzki hegatsa ere oso luzea da, mintzez elkarturiko erradioz osatua^[5]. Bizkarraldea matroi-gorrixka iluna da eta sabelaldea marroi-gris argia^[6].

Burua nahiko txikia du eta ahoa ere txikia da. Izena ematen dioten bost luzakin ditu aho ingurua, bina sudurtzulo bakoitzaren gainean eta bosgarrena azpiko barailan. Ahoaren gainean ez du tolesturarik^[5].

Banaketa

Iparraldeko uretan bizi den arrain espeziea da, Ozeano Atlantikoaren ekialdean. Islandiatik eta Norvegia iparraldetik behera, Britainiar uharteak eta Bizkaiko golkoan barrena, Lisboa ingururarte hedaturik dago^[6]. 8-24 ºC arteko tenperaturatan bizi dira. Klima larrialdiaren ondorioz uraren tenperatura igotzen ari da eta espeziearen populazioen jaitsiera ekar dezake horrek.

Marea arteko eremuan aurkitzen da, itsaso hondoko arroka artean ezkutatuta, edota alga ugari duten hondo hareatsuetan. Alga berdeak hazten diren puntutik behera ez da ikusten, gehienez ere 20 metrotako sakoneran^[6].

Biologia

Elikadura

Espezie demertsala da. Arroketako zuloetan ezkutatuta egoten da zelatan eta eraso azkarrak eginez krustazeoak, itsas zizareak, gastropodoak eta batzuetan arrain txikiak jaten ditu. Dieta osatzeko algataz ere elikatzen da.

Ugalketa

Errunaldia otsaila eta maiatza artean gertatzen da Britainiar uharteen inguruan. Aholatz bostbixar eme gazteek 9.000 arrautza askatzen dituzte, eme handiagoek 30.000 arrautza ere bai. Arrautzak ur sakonetan askatzen dituzte baina ondoren ur azalera igotzen dira. Handik jaioko diren larbak ere pelagikoak dira, eta handitzen direnean arrain txikiak kostaldera hurbiltzen dira^[6].