Nurse - L'infermiera
|
C'l artìcul chè 'l è scrit in
Miranduléś |
 Nurse 3D
| ||
| Nurse - L'infermiera | ||
 La Paz de la Huerta in na figùra dal film | ||
| Nurse - L'infarméra 2013 | ||
|---|---|---|
| Regìa: Douglas Aarniokoski | ||
| Scritōr: Douglas Aarniokoski • David Loughery | ||
| Atōr: Paz de la Huerta • Katrina Bowden Judd Nelson • Corbin Bleu • Melanie Scrofano Kathleen Turner • Martin Donovan • Boris Kodjoe | ||
| Müsica: Anton Sanko | ||
| Léngua: Ingléś | ||
| Dürä dal film: 84 minüt | ||
| Nasiōṅ: Stat Unî | ||
Nurse - L'infermiera (Nurse - L'infarméra) 'l è 'n film ad scarésa americàṅ dal 2013 ad Douglas Aarniokoski ch'al 'l à anc scrit insém a David Loughery. In na part piculìna, qvéla dla capa dgl'infarméri, a gh'è anc la Kathleen Turner.
'L è stâ girâ c'n un budget ad déś migliòṅ ad dòlar.
Sunt
L’Abby Russell (Paz de la Huerta) l'è na lèśbica amìga 'd un ragàs ch'al stà darènt a lē e ch'al lavóra in 'n ubitòri, Jared (Adam Herschman), méntar lē la fà l'infarméra in 'n uśdàł pùblic a New York. A dir-la tuta la śuvnòta la gh'à anc n'atra misiòṅ in dla vita, qvéla 'd cupàr gl'óm spuśâ ch'l'incróśa in gir ch'i mét'n i còran a 'l sò mujér parchè la n s i cumpatìs pròpria briśa. La i và a pascàr in di lucài nutùran vistìda cuma na rója nimàla e qvi lè i càscan śò cuma di pir madûr ch'l'è na belésa.
Un dè a riva a lavuràr sèg la Danni Rogers (Katrina Bowden), n'infarméra śōvna péna vgnuda fóra da scóla ch'la gh piàś dimóndi ma anc a 'l dutōr Robert Morris (Judd Nelson) ch'al gh mòla na quàlc tastàda quànd al gh pasa davśèṅ. Sò màdar, la Marcia (Linda Papadopoulos), la s è cumpagnàda c'n un psicòlug ciamâ Larry Cook (Martin Donovan), 'n óm ch'al gh'à cal brut visi lè ad far al purcùs cun di atri dóni. L’Abby, par tgnir-al 'd òć, la taca a 'ndàr in dal sò studi faghénd finta 'd èsar na dóna inśgórda di óm dgénd-ag ch'la vōl curàr-as c'n al sò ajùt. In cal méntar la s pòrta a lèt la Danni, sénsa che 'l sò muróś Steve (Corbin Bleu) 'l al sàppia, dand-ag dla pólvra in dal bicér par rimbambìr-la, pò la gh ślunga anc la sò ciàṿ ad cà che, s'la vōl pasàr, l'è libra 'd fàr-al. Na sira la paralìśa Larry cun dal vecuróni e pò la gh fà far 'n incidènt in màchina par far-al fóra sénsa dar in d'l òć anc s'al detective Rogan (Boris Kodjoe) al ciàpa in maṅ al caś.
Un dè a riva a 'l uśdàł la respunsàbila nóva dal risórsi umàni, la Rachel Adams (Melanie Scrofano), che quànd la véd l’Abby la gh diś ch'la sò ghigna la gh arcòrda qvéla dna sèrta Sarah Price. Qvél che però la Rachel la n sà minga 'l è ch'la Sarah, da pìcula, l'iva tajâ la góla 'd sò pàdar mèdag Robert (Jeff Pangman) dòp ch'la 'l iva bcâ a ciulàr-as la sò infarméra a nuànta in dal sò studi faghénd un śōg ciamâ „lóga 'l sarpènt“.