Guido

Al guido (a s lèś /ˈɡwiːdoʊ/ in ingléś) 'l è 'n tèrmin dla léngua ingléśa druâ cuma 'n insûlt ètnig p'r uféndar e tōr in gir al parsòni americàni cun dal raìś itagliàni fiōli ad gint pòvra e 'd uperàj, specialmènt in chi stat in du a gh 'n è da piò cuma 'l New Jersey, New York, al Connecticut e al Rhode Island. La pōl anc èsar dita in di cunfrònt dgl'itagliàṅ ch'i lévan tròp la crésta e ch'i faṅ i bui cumpurtànd-as da masćiàs. Da dgl'atri bandi a s dróa invéci 'n àtar nóm: Mario a Chicago e Gino a East Haven, Turònt e a Montreal.

A gh'è l'idéa che cla paròla lè la sia saldàda fóra fra i an Stanta e i an Utànta e ch'la daśvéggna da 'l nóm itagliàṅ Guido o da 'l vèrub Guidàr. In Emìglia-Rumàgna a i prévan ciamàr di tàngar, di martùf, di mingòṅ, di gréś ch'i pìgan, di giavàs, di sandròṅ, di tamàr.

Un guido 'l è sòlit vistìr-as cun dal giàchi 'd pèla, dal canutéri e dal camìśi fini ma scalvìdi o strichi par far véd'r i mùscui. Al pòrt' adòs dal cadnìni 'd òr o cun di sant insìma, di anèi a 'l manvèṅ e di còran pòrta-furtùna. I tînan da spés i cavìi a la pompadour o mis in órdan cun dal gèl.

Quànd in sal canàł televiśìṿ MTV 'l è vgnû fóra in di Stat Unî un prugràma dal gènar „rusc“ impinî ad guido ciamâ Jersey Shore, 'l à fat sù dimóndi pulémichi^[1].