Monte San Petrone

U monte San Petrone hè una muntagna situata in Corsica, in a regione di a Castagniccia.^[1]

E pendite di 'ssu massicciu matticciosu sò cuperte à castagni vultati à u statu di furesta, ciò chì li vale u nome di Castagniccia.

'Ssa regione di Corsica prisenta una forte densità di cumune incù i paesi medievali appiccati à i spiculi è e punte di u massicciu. Hè oghje poca pupulata.

U monte San Petrone occupa una pusizione cintrale in Castagniccia ; hè a più vetta alta di l'inseme muntosu. Di forma tavulare, culmineghja à 1767 metri è offre una vista di prima trinca annantu à parte assai di a Piana orientale. Strapiomba e regione minore d'Orezza, Ampugnani, Rustinu è Vallerustie. Una tavula d'orientamentu ci hè stallata. Delimiteghja a parte orientale di u massicciu chì face parte di u parcu naturale regiunale di Corsica. U so virsante occidentale dumineghja a Casaluna è s'affaccia à a regione di a Ghjuvellina incù e Penne Rosse. Quandu u tempu hè hjaru, omu pò sculunnà ci u stagnu di Chjurlinu. À u sudu, e Caldane sò spiccate da u monte San Petrone da a foce d'Orezza (1296 m).

U massicciu à u sensu largu cumporta altri vertici :

• u Monte Sant'Anghjulu (1218 m) à u nordu, dumineghja a Casinca à u nordestu, u Casaccuni à u nordupunente è l'Ampugnani à u sudu ;
• u Monte Olmelli (1285 m) à livante ; dumineghja u Moriani è l'Orezza ;
• u Monte Negrine (1133 m) è Castellu di Osari (1109 m), vertici di u Campuloru ;
• u Monte Pianuforte Maggiore à punente, duminendu e Vallerustie à u nordu, u Boziu à u sudu è u Talcini à punente ;
• a Punta di Caldane (1724 m) è a Cima di Callerucciu (1731 m) à u sudupunente, chì dumineghjanu u Boziu à punente, l' Alesani à livante è a Strinse à u sudu ;
• u Monte Sant'Appianu (1093 m) à l'estremu sudestu, chì dumineghja u Verde ;
• a Punta Cerviu (1189 m) à l'estremu sudu, chì dumineghja u Gaghju.

I fianchi settentriunali di u monte San Petrone sò cuperti da a parte nordu di a furesta di Santu Petru d'Accia, zona naturale d'interessu eculogicu, faunisticu è floristicu numinata "faiete di u massicciu di u San Petrone ". S'è i so fianchi orientali è meridiunali prisentanu annantu à e so alture una roccia nuda, sò invece buscosi è verdicanti à u pianu inferiore, cuperti per u più da castagnete, prisente sottu à forma di frutteti o di ***taillis, in zona naturale d'interessu eculogicu, faunisticu è floristicu numinata "Castagnete di a piccula Castagniccia ".

Numerosi fiumicelli anu a so surghjente annantu à i so fianchi. I più impurtanti sò :

• à punente u fiumicellu di l'Ochju à u Capu, altru nome di u fiumicellu di Gavignanincu ;
• à livante, i fiumicelli di Falongu, d'Alzicciu (o fiumicellu di San Fiumentu), di Tigliola è di Lavatoghju ;
• à u sudu, i fiumicelli di Persico (o fiumicellu di Forci) è di Parella. À un chilomitru à u sudu, nasce u Fiumaltu.

Hè à u monte San Petrone (San Petru) ch'è parechji storichi lucalizeghjanu l'anzianu Monte Nigeunu è u locu dettu Cellas Cupias chì omu ritrova in a currispundenza di u papa Grigoriu u Maiò. Ma nissuna prova archeulogica ùn permette di validà 'ssa ipotesi.

In fine di u seculu VI, Petru, vescu d'Aleria, ricevia di u papa Grigoriu Ia a missione di custruisce una basilica è unu battisteriu annantu à i fianchi di u monte Nigheunu, à u centru di i duminii puntificali di Cellae Cupiae.

Architettata à u nordu di u monte San Petrone à 1070 metri d'altitudine, a basilica era stata aperta à u cultu in u 598, sottu à u nome di Santu Petru. Si deve identificà incù a chjesa San Petru d'Accia^[2]. Trè anni dopu à unu presbiteriu era annessatu à u palazzu principale.

Oltre e ruvine di a prima basilica di Corsica, u situ cumporta a cappella San Petru edificata à u seculu XVII annantu à i basamenti di u presbiteriu.

Un stradellu di girandulata attraversa u massicciu da u nordu à u sudu, partendu da Barchetta (A Vulpaghjola per righjunghje A Mazzola in u Boziu. A vetta hè accessibile dapoi a Bocca di u Pratu (985 metri) induv'ellu passa u stradone D71, o ancu à parte da Campidonicu paisolu di Ped'Orezza.

U monte San Petrone hè un scopu di spassighjata è di girandulate per i più agguerriti. Da a bocca à u Pratu chì franca u stradone D71, ci vole à suvità u stradellu versu u monte San Petrone cum'è indicatu da u pannellu. Ci vole à cuntà circa trè ore di marchja per unu percorsu di sei chilomitri incù unu slivellatu di 800 metri.

Unu stradellu hè accessibile da Loriani (paisolu di a cumuna di Cambia) per unu percorsu equivalente.

U monte San Petrone hà datu u so nome à un tipu di casgiu corsu fabbricatu da una Sarl situata in Castellu di Rustinu, una cumuna situata annantu à i fianchi settentriunali di u monte San Petrone.

Hè unu casgiu à u latte di pecure, fattu à crudu, à pasta molla, fattu in una casgiaghja, sguttatu eppo salatu à a manu. Si pò cunsumà in i 120 ghjorni seguenti a so fabricazione. U so sapore hè dolce, simile à quellu di u casgiu venachese.

1. ↑ 'Ss'articulu pruvene in parte da l'articulu currispundente di a wikipedia in francese.
2. ↑ Paulu Matteiu di La Foata Ricerche è note diverse annantu à a storia di a Chjesa in Corsica, p. 52.

• Geugrafia di a Corsica
• Castagniccia