明朝

參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

明朝也號𡅏大明或者明國，是中國歷史懸頂其蜀隻封建王朝，也是最後蜀隻漢族儂做皇帝其王朝。

明朝其頭隻皇帝是洪武皇帝朱元璋。者儂是今旦安徽鳳陽儂。做細辰候厝逼，爸奶都敆做災其辰候餓死。許辰候中國是由蒙古儂其元朝（也號𡅏胡元）統治其，百姓生活野喫虧，故此野価儂造反。朱元璋經過舊底其客佻幫湯和其對手，着1352年去郭子興夫塊投軍。郭子興野看重伊，讓伊做將軍。不過遘尾了伊見覺郭子興者儂無箬使，就獨立出來自家發展。伊先將陳友諒、張士誠茲蜀陣滅唻，再派部隊拍北京，將元朝最後蜀隻皇帝元順帝逐去漠北。1368年，敆應天（今旦其南京）登基，國號「大明」，年號「洪武」。明朝就總款產生了。

朱元璋在位其辰候，會驚囝弟其皇位乞儂奪去，將有功其儂都刣差不多了，復派自家其囝去各地做藩王。1398年伊褪環以後，因為大囝已經生去，就讓長孫建文皇帝接班。建文對自己其幾隻家家野𣍐放心，借各種理由將伊各儂其藩除唻。其中蜀隻家家朱棣敆1398年着順天（今旦其北京）造反，最終着1402年拍遘應天，將皇位奪去。者朱棣就是歷史懸頂出名其永樂皇帝。

建文儂變無塊討，有其儂講伊走去西洋，故此永樂派鄭和，着1405年落西洋去討。由許年開始，鄭和落西洋落七回，遘過野価舊底透底無聽過其國家。不過，建文到底敆底所，最尾蔣其，遘現在固無儂會曉。

永樂其辰候是明朝最發達其時期。1449年，明英宗去拍蒙古，自家乞蒙古兵拿去。由嚽以後明朝發展無以前好了。遘尾了復加𡅏倭寇剃了侵略南方，滿洲（就是以後其滿清）侵略東北，國家開始罔做罔呆。

天啓皇帝在位其辰候，皇帝𣍐仈字，故此讓太監魏忠賢對手伊處理政治。1627年，崇禎皇帝上臺，將者魏忠賢刣唻。崇禎本底卜想好好改革蜀下，無能耐政治腐敗，囫圇國大做災，蜀七處農民大造反。最終着1644年，李自成其農民軍拍下北京，崇禎自殺。歷史學家都將茲蜀年當作明朝滅亡其年。

李自成入北京以後，伊其部下將野価當官其財產奪去，復敆北京城裡勢亂不做。明朝守山海關其將軍吳三桂，伊其細婆陳圓圓就乞李自成其部下劉宗敏奪去，伊郎爸吳襄也受遘李自成其迫害。吳三桂肝火棕，放滿清部隊入關，將李自成滅唻。滿清復派兵向南，將囫圇隻中國拍下來。

明朝滅亡以後，固有野価大臣共將軍着南方立明朝其親王做皇帝，反抗滿清，最終都乞滿清滅唻。茲幾隻政權都乞今旦儂號𡅏「南明」。1662年，永曆皇帝着雲南乞吳三桂滅唻，南明實際滅亡。敆臺灣其鄭成功，雖然講固是使明朝其年號，但是者鄭成功特零意伓立明朝皇帝，實際伊乍是臺灣「東寧王國」其實際統治者。

1683年，滿清拍下臺灣，鄭克塽投降，東寧王國滅亡。

維基共享裡勢有共明朝有干過其內容。