Loupard koumoulek
| |||
|---|---|---|---|
 N. nebulosa
| |||
| Rummatadur filogenetek | |||
| Riezad : | Animalia | ||
| Skourrad : | Chordata | ||
| Kevrennad : | Mammalia | ||
| Urzhad : | Carnivora | ||
| Kerentiad : | Felidae | ||
| Genad : | Neofelis | ||
| Anv skiantel | |||
| Neofelis nebulosa (Griffith, 1821) | |||
| Statud CITES : |  Stagadenn I ,Adwel 01-07-1975 | ||
D'ar vevoniezh   e tenn ar pennad-mañ. | |||
Al loupard koumoulek (Neofelis nebulosa) a zo ur c'hazheg krenn e vent (60 - 100 cm evit 11 - 20 kg) eus gevred Azia. Ur vlevenn bej pe gell sklaer en deus gant damhirgelc'hioù teñval o bevennoù, heñvel ouzh koumoul. En abeg da frammadur e glopenn e renker anezhañ en ur genad ispisial.
Perzhioù fizikel
[kemmañ | kemmañ ar vammenn]Ur c'horf tagos en deus al loupard koumoulek hag an dent-lagad hirañ, e-keñver e vent, eus an holl gizhier. An dra-se a lakaas klaskourien 'zo da grediñ e chasee anevaled bras. Hiziv, daoust m'anavezer nebeut a draoù diwar-benn doare-buhez al loen-se, e kreder e hemolc'h anevaled-gwez dreist-holl (evel ar gibboned pe ar makaked) hag un nebeud bronneged bras pe vrasoc'h, kirvi en o zouez, hag evned.
Al loupard koumoulek zo ur pigner peurvat. Ul lost ken hir hag e gorf a c'hell kaout hag e bavioù berr ha gwevn a lak anezhañ da zilec'hiañ er gwez gwelloc'h eget an holl gizhier arall.
Annez
[kemmañ | kemmañ ar vammenn]
Al loupard koumoulek a vev e su Sina, e reter Himalaya, e biz India, e gevred Azia hag en Indonezia. Krediñ a reer ez eo aet da get e Taiwan. Bevañ a ra er c'hoadegoù trovanel pe istrovanel betek 2 000 metr dreist-holl, met e gavout a c'heller er geunioù-mor hag er pradennoù.
3 isspesad a anavezer:
- Neofelis nebulosa brachyurus: Taiwan (aet da get)
- Neofelis nebulosa macrosceloides: Nepal ha Myanmar
- Neofelis nebulosa nebulosa: Su Sina
Emzalc'h
[kemmañ | kemmañ ar vammenn]Mibin-tre eo al loupard koumoulek. Er mirvaoù e c'hell chom a-ispilh ouzh ur brank gant e bavioù a-dreñv en ur implijout e lost da virout e blom. Nebeut a draoù a anavezer a-zivout e emzalc'h en natur. Krediñ a reer e hemolc'h oc'h en em lezel da gouezhañ war e breizhoù.
Un aneval-kuzh eo. Krediñ a ra d'ar glaskourien e vev e-unanik war-bouez mare amzer ar gouennadur. Daoust d'ar pezh a greder gwechall e hemolc'h e-pad an deiz ivez.
Gouennadur
[kemmañ | kemmañ ar vammenn]Ur wech ar bloaz e vez ganet gant ar parezed etre ur c'holen ha pemp kolen goude un dougen a 85 - 93 devezh. Evel kalz kizhier arall eo dall ar re yaouank pa c'hanont. Goude dek devezh hepken e c'hellont gwelout ha n'int ket oberiant nemet goude pemp sizhun. Da zaou vloaz e tizhont o oad-gour war a seblant, met dizalc'h ez int goude dek mizvezh.
Er mirvaoù e c'hell al loupard koumoulek bevañ 17 bloavezh. Berroc'h eo e hoali en natur avat.
Diaes eo lakaat anezho da barañ er mirvaoù kar ar pared a lazh alies ar parezed n'int ket boazet outo.
Mirerezh
[kemmañ | kemmañ ar vammenn]N'ouzer ket pegement a louparded goumoulek a chom en natur. Krediñ a reer ez eo aet o niver war zigresk en abeg da zistrujadur o annez ha d'an hemolc'h. War stagadenn I ar CITES emañ.