Pancasila

Pancasila (hurup Arap gundul: فنچسيلا) entu idéolohi dasar negara Indonésia. Pancasila asalnya deri dua kata basa Sangsekerta, ya'entu: पञ्च pañca 'lima', èn शील śīla 'nilé, sipat'. Pancasila entu rumusan ama pedoman keidupan bebangsa ama benegara bakal seruruh ra'yat Indonésia.

Adapun lima sila nyang jadi Indonésia punya dasar negara ada kecantum di dalem Mukadimah Wèt Dasar^[1] tahon 1945, pasnya di paragrap keempat, antara laèn:

1. Ketuhanan nyang Maha-Tunggal (basa Indonésia: Ketuhanan yang Maha Esa)
2. Kemanusiaan nyang adil èn beradab (basa Indonésia: Kemanusiaan yang adil dan beradab)
3. Rempug (persatuan) Indonésia (basa Indonésia: Persatuan Indonesia)
4. Kera'yatan nyang dipimpin ama hikmat kebijaksanaan dalem perhadring/perwakilan (basa Indonésia: Kerakyatan yang dipimpin oleh hikmat kebijaksanaan dalam permusyawaratan/perwakilan), srènta
5. Keadilan sosial bakal seruruh ra'yat Indonésia (basa Indonésia: Keadilan sosial bagi seluruh rakyat Indonesia).

Bagèn pernah ada pengrobahan isi èn urutan di dalemnya selamanya pengrancangan deri waktu ke waktu di tahon 1945, Pancasila ditetepin diperingetin saban 1 Juni, nyang sekarang dikenal sebagé milad Pancasila.

Awalnya, ni mulanya deri pertanyaan Dr. Kanjeng Radèn Tumenggung (KRT) Radjiman Wedyodiningrat punya kasi, pas dia punya pidato mukadimah pengejaan Badan Penyerep Ongkodan Penyiapan Kemerdékaan Indonésia (basa Indonésia: Badan Penyelidik Usaha Persiapan Kemerdekaan Indonesia; singketan: BPUPKI). Dia punya pertanyaan ièlah apa bakalannya ni negara punya dasar.^[2]

Dalem mengrumusin Pancasila sebagé dasar negara nyang resmi, ada usulan-usulan pribadi nyang diutarain di dalem perhadring BPUPKI. Mohammad Yamin, tanggal 29 Méi 1945, ada ngasi usulan dalem dia punya pidato nyang disebut sebagé Lima Dasar, ya'entu: prikebangsaan (perikebangsaan), prikemanusiaan (perikemanusiaan), priketuhanan (periketuhanan), prikera'yatan (perikerakyatan), èn kesejahteraan ra'yat (kesejahteraan rakyat).^[3] Adapun dia punya dalil ièlah kalo entu udah ngoyod sedari sejeg bujeg di kalangan masarakat Indonésia. Cuman, Mohammad Hatta, sepagémana dalem dia punya mémoar, ngeraguin tu Yamin punya pidato.^[4]

Ari bulan 1 Juni tahon 1945, ujug-ujug Sukarna (Soekarno) ngasi pidato spontan nyang dikenal sebagé Lahirnya Pancasila.^[5] Sukarna ngemukain dasar-dasar nyang lima nama "Pancasila"^[6], sebagé berikut: kebangsaan Indonésia (kebangsaan Indonésia) atawa kebangsaan (nasionalisme), kemanusiaan (kemanusiaan) atawa keantèrobangsaan (internasionalisme), mupakat (mufakat) atawa kera'yatan (dèmokrasi), kesejahteraan sosial (kesejahteraan sosial), srènta ketuhanan nyang bekebudayaan (ketuhanan nyang berkebudayaan). Mangka, entu hal maktup dalem dia punya pidato begini^[7]:

Sekarang banyaknya prinsip: kebangsaan, internasionalisme, mufakat, kesejahteraan, dan ketuhanan, lima bilangannya. Namanya bukan Panca Dharma, tetapi saya namakan ini dengan petunjuk seorang teman kita ahli bahasa – namanya ialah Pancasila. Sila artinya asas atau dasar, dan di atas kelima dasar itulah kita mendirikan negara Indonesia, kekal dan abadi.

Sebelonnya tu perhadring kelar, dikeja dah tuh panitia bakal ngerumusin Pancasila bedasarin pidato Sukarna punya ucap ari bulan 1 Juni tahon 1945, nyang tu nama panitianya – Panitia Sembilan. Deri tu panitia, rempug dah tu atu hasil rencana ari bulan 22 Juni tahon 1945 nyang namanya Piagem Jakarta.

Seabisnya diterimanya rumusan Pancasila jadi dasar negara secara resmi, sengga'nya ada beberapa dokumèn penetepannya, antara laèn:

• Rumusan Pertama : Piagem Jakarta (Jakarta Charter) – ari bulan 22 Juni tahon 1945
• Rumusan Kedua : Mukadimah Wèt Dasar tahon 1945 – ari bulan 18 Agustus tahon 1945
• Rumusan Ketiga : Mukadimah Wèt Dasar Républik Indonésia Serèkat – ari bulan 27 Dèsèmber tahon 1949
• Rumusan Keempat : Mukadimah Wèt Dasar Sementara – ari bulan 15 Agustus tahon 1950
• Rumusan Kelima : Rumusan Pertama nyang njiwain Rumusan Kedua èn atu rangkéan ama Wèt Dasar (mengruju' Dékrit Persidèn tahon 1950).

Ari bulan 1 Juni tahon 2016, Persidèn Jaka Widada (Joko Widodo) ada nèken Beslit Persidèn (Keppres) Nomor 24 Tahon 2016 pasal Milad Pancasila (basa Indonésia: Hari Lahir Pancasila) sekaligus netepin tu hari jadi hari peré.^[8]

• Indonésia

1. ↑ Wèt dasar (hurup Arab Gundul: ويت داسر) – konstitusi (Indo.); constitution (Ing.); grondwet (Wld.).
2. ↑ Hatta, Mohammad (2015). Politik, Kebangsaan, Ekonomi (1926-1977). Jakarta: Kompas. h. 309. ISBN 9789797099671.
3. ↑ M.H, Dr Jazim Hamidi, S. H. (2013-01-12). CIVIC EDUCATION. Gramedia Pustaka Utama. h. 53. ISBN 978-602-03-4927-5.
4. ↑ Suwarno, P.J. Pancasila Budaya Bangsa Indonesia. h. 12.
5. ↑ Schindehuette, Matti Justus (2006). Zivilreligion als Verantwortung der Gesellschaft. Religion als politischer Faktor innerhalb der Entwicklung der Pancasila Indonesiens. Hambereg: Universitas. h. 151.
6. ↑ Sihotang, Kasdin; Mikhael, Mali Benyamin; Molan, Benyamin; Kama, Vinsensius Felisianus (2019-07-30). Pendidikan Pancasila: Upaya Internalisasi Nilai - Nilai Kebangsaan. Penerbit Unika Atma Jaya Jakarta. h. 46. ISBN 978-623-7247-07-4.
7. ↑ S.H, Prof Dr Sutan Remy Sjahdeini (2021-08-01). Sejarah Hukum Indonesia: Seri Sejarah Hukum. Prenada Media. h. 51. ISBN 978-623-218-947-8.
8. ↑ "Jadi Hari Libur Nasional, Inilah Keppres Penetapan 1 Juni Sebagai Hari Lahir Pancasila" Diarsipin 22 Oktober 2017 di Wayback Machine., Sekretariat Kabinet Republik Indonesia, (diaksès 01 Oktober 2016)