Міхал Касакоўскі

Міхал Касакоўскі
польск.: Michał Kossakowski
1-ы ваявода браслаўскі 17 сакавіка 1794 — 1795
25-ы ваявода віцебскі 22 лютага 1787 — 17 сакавіка 1794
Папярэднік	Юзаф Прозар
28-ы кашталян віцебскі 5 чэрвеня 1781 — 22 лютага 1787
Папярэднік	Юзаф Прозар
Пераемнік	Адам Эвальд Фёлькерзамб[d]
пісар скарбовы літоўскі 1765 — 1781
Пераемнік	Рафал Слізень[d]
падстолі ковенскі[d] з 1761
Нараджэнне	23 ліпеня 1733(1733-07-23) Кёнігсберг, Каралеўства Прусія
Смерць	18 студзеня 1798(1798-01-18)[1] (64 гады)
Месца пахавання	Вайткушкіс[d]
Род	Касакоўскія
Бацька	Дамінік Касакоўскі
Маці	Марыяна з Забелаў[d]
Жонка	Барбара з Зыбергаў[d][2]
Дзеці	Юзаф Дамінік Касакоўскі
Член у	Таргавіцкая канфедэрацыя
Узнагароды

Міхал Касакоўскі (23 ліпеня 1733, г. Каралявец — 18 студзеня 1798) — дзяржаўны дзеяч Вялікага Княства Літоўскага, пісар скарбовы літоўскі, падстолі ковенскі, кашталян віцебскі (1781—1787), ваявода віцебскі (1787—1794) і браслаўскі (1794—1795). Кавалер ордэнаў Белага Арла і Святога Станіслава.

Паходзіў са шляхецкага роду Касакоўскіх герба «Слепаўрон». Старэйшы з чатырох сыноў стольніка жамойцкага і стражніка ковенскага Дамініка Касакоўскага (1711—1743) і Марыяны з Забелаў. Малодшыя браты — кашталян інфлянцкі Антоній, біскуп інфлянцкі Юзаф Казімір і апошні гетман вялікі літоўскі Шыман Марцін Касакоўскі.

Служыў у войску. У 1764 годзе Міхал Касакоўскі быў абраны паслом ад Ковенскага павета на элекцыйны сойм, дзе падтрымаў выбранне на польскі каралеўскі прастол Станіслава Аўгуста Панятоўскага. Ковенскі падстолі з 1761, пісар скарбовы літоўскі ў 1765—1781, кашталян віцебскі ў 1781—1787 і ваявода ў 1787—1794, ваявода браслаўскі з 1794. У 1766—1775 гадах член Скарбовай камісіі ВКЛ.

У 1781 атрымаў ад аўстрыйскай імператрыцы Марыі Тэрэзіі графскі тытул.

У 1788 годзе быў выбраны паслом на Чатырохгадовы сойм.

Праціўнік канстытуцыі 3 мая 1791 года. Быў уключаны ў спіс польска-літоўскіх паслоў і сенатараў, складзены ў 1792 годзе расійскім паслом Якавам Булгакавым, якія выступалі супраць рэфармавання ладу Рэчы Паспалітай.

У 1792 годзе ваявода віцебскі Міхал Касакоўскі быў прызначаны саветнікам генеральнай канфедэрацыі Вялікага Княства Літоўскага ў складзе Таргавіцкай канфедэрацыі. У 1794 годзе быў прызначаны першым ваяводай браслаўскім. У тым жа 1794 годзе Міхал Касакоўскі стаў маршалкам Трыбунала Вялікага Княства Літоўскага, але праз пачатак паўстання пад кіраўніцтвам Тадэвуша Касцюшкі не заняў гэтую пасаду.

У студзені 1798 года 64-гадовы Міхал Касакоўскі памёр, быў пахаваны ў радавым маёнтку Касакоўскіх — Вайткушках.

Быў у шлюбе з Барбарай з Зібергаў (пам. 1811), ад якой меў сына — Юзафа Дамініка (1771—1840), лоўчага вялікага літоўскага і зяця Станіслава Шчэнснага Патоцкага.

• Касакоўскія // Вялікае княства Літоўскае: Энцыклапедыя. У 3 т. / Рэдкал.: Г. П. Пашкоў (гал. рэд.) і інш.; маст. З. Э. Герасімовіч. — Мн.: Беларуская Энцыклапедыя, 2005. — Т. 2: Кадэцкі корпус — Яцкевіч. — 792 с. — ISBN 985-11-0378-0 (т. 2), ISBN 985-11-0315-2.
• Polski Słownik Biograficzny, tom XIV, 1968—1969 (artykuł Edmunda Rabowicza)

1. ↑ Senatorowie i dygnitarze Wielkiego Księstwa Litewskiego 1386—1795 / пад рэд. J. Wolff — Kraków: 1885. — С. 8.
   <a href="https://wikidata.org/wiki/Track:Q123243396"></a>
2. ↑ Pacowie : materyjały historyczno-genealogiczne / пад рэд. J. Wolff — СПб.: 1885. — С. 302. — 377 с.
   <a href="https://wikidata.org/wiki/Track:Q124661538"></a>