Голос народа (Бабруйск)

«Голос народа» — штодзённая сацыял-дэмакратычная рабочая газета. Выдавалася з 28 мая (10 чэрвеня) да 16 (29) жніўня 1917 года ў Бабруйску на рускай мове ў друкарні З. Х. Столберга. Выйшла 69 нумароў^[1].

Па дамоўленасці з выдаўцом газеты Б. М. Бахрахам выконвала функцыі друкаванага органа Бабруйскага Савета рабочых і салдацкіх дэпутатаў да арганізацыі апошнім уласнага выдання. Рэдактар Я. Д. Розенталь (адначасова сакратар рабочай секцыі і член прэзідыума выканкама Савета, член камітэта Бунда), Б. М. Бахрах (з сярэдзіны ліпеня). Праводзіла агульнадэмакратычны, надпартыйны курс на арганізацыю рабочага руху горада ў адзіны сацыялістычны блок^[1].

Друкавала матэрыялы ў падтрымку Часовага ўрада, перадвыбарчую праграму сацыялістычнага блока ў гарадскую думу. Газета асвятляла разнастайныя бакі жыцця грамадскасці Бабруйска. Змяшчала аб’явы палітычных партый і грамадскіх арганізацый, справаздачы сходаў, змест лекцый або дыскусій. Шмат месца адводзіла яўрэйскаму рабочаму руху, жыццю яўрэйскага насельніцтва Бабруйска. Газета паведамляла пра становішча на франтах і агітавала за ўмацаванне баяздольнасці расійскай арміі^[1].

3 18 ліпеня пачала выходзіць пад назвай «Бобруйская вечерняя газета „Голос народа“». 3 гэтага часу матэрыялы выдання страцілі арганізатарска-асветніцкую функцыю, рабочую спецыфіку і грамадска-палітычную накіраванасць. Перадрукоўвала ў асноўным артыкулы з цэнтральных выданняў^[1].

• «Голос народа» // Культура Беларусі: энцыклапедыя / рэдкал.: Т. У. Бялова (гал. рэд.) [і інш.]. — Мн.: Беларус. Энцыкл. імя П. Броўкі, 2012. — Т. 3. — 688 с. — 3 000 экз. — ISBN 978-985-11-0662-8.