Антарктычны клімат

Антарктычны клімат — клімат Антарктыды і прылеглых да яе акіянскіх прастораў (Антарктыкі).

Над мацерыком надзвычай суровы. Тэмпература паветра на працягу года адмоўная: летам у студзені да −13,6 °C, зімой у ліпені −60…-70 °C, на полюсе холаду (станцыя Усход) самая нізкая на Зямлі — каля −90 °C. Ападкаў за год менш за 100 мм. Надвор’е вызначаецца Антарктычным антыцыклонам. Большая частка сонечнай радыяцыі адбіваецца снегавым покрывам (альбеда каля 85 %), вялікія страты цяпла даўгахвалевым выпрамяненнем з-за высокага становішча паверхні над узроўнем мора. На ўзбярэжжы тэмпература паветра летам павышаецца да 0-5 °C, гадавая сума ападкаў да 700—1000 мм, моцныя сцёкавыя і ўраганныя (40-60 м/с) вятры.

Клімат акіянскіх прастораў Антарктыкі характарызуецца рэзкімі ваганнямі ціску, частымі цыклонамі, параўнальна аднароднымі тэмпературамі паветра.

• Беларуская энцыклапедыя: У 18 т. Т.1: А — Аршын / Рэдкал.: Г. П. Пашкоў і інш. — Мн.: БелЭн, 1996. — 552 с.: іл.
• Геаграфія ў тэрмінах і паняццях: Энцыклапедычны даведнік / Беларус. Энцыкл.; Рэдкал.: Г. П. Пашкоў і інш. — Мн.: БелЭн, 2003. — 352 с.: іл. — ISBN 985-11-0262-8.

	Антарктычны клімат на Вікісховішчы