Jose Fuentebella
Si Jose T. Fuentebella (17 Hunyo 1882 - 31 Hulyo 1982) dating Gobernador kan Camarines Sur, sarong abogado, estadista, asin saro sa myembrong kagtogdas kan Partido Nacionalista (1907). Siya nagin opisyal sa gobyerno na mahigos nagsirbi nin halawig na panahon bilang gobernador, representante, senador asin embahador kan Filipinas.
Siya naapod asin nabansagan komo "Grand Old Man of Bicol Politics."[nangangaipo nin toltolan]
Kaamayan kan buhay
[baguhon | baguhon an source]Si Jose aki ni Mariano Fuentebella na may dugong Kastila an ginikanan nasusog pa na haleng Segovia, Espanya. An saiyang ama, sarong mayaman asin madagang komprador, nagin gobernadorcillo kan Sagnay, Camarines Sur dangan gobernador kan Ambos Camarines (1912-1916). An ina niya iyo si Perpetua Tria na pareho kan ama' niya, namundag sa Sangay. Nagadal siya asin nagkua nin Artes Batsilyer, summa cum laude, sa Ateneo de Manila (1902), nakatapus nin abogasya, summa cum laude, sa Escuela de Derecho kan 1905. Nakapasar sa Bar kan taon 1906.
May duwa siyang ngohod na tugang, si Manuel , sarong doktor asin si Felix, sarong inhenyero. An duwa niyang tugang na ini pareho man nagin pulitiko asin nagsirbi komo mga Representante kan Camarines Sur asin ta si Felix nagin man Gobernador (1976-1986) kan sinabing probinsya, sa saindang sadiring panahon.
Karera sa pulitika
[baguhon | baguhon an source]Si Jose nagin Representante kan Ambos Camarines sa ika-2 asin ika-3 Asambliya Nasyonal nin pitong taon (1909-1916) na sa laog kan turno niya nagin siyang Speaker Pro Tempore (1914). Kan magadan an ama niyang si Don Mariano siya an nagsalida komo gobernador (1916). Pakatapos kan turno niyang ini nag'ubos siya nin panahon sa pag'asikaso sa mga negosyo kan pamilya asin pagpraktis kan saiyang abogasya. Alagad an kamawotan niya na magsirbi naman sa banwaan dai natios. Nagdalagan siya uli sa eleksyon komo senador representado an ika-6 na distrito (Bicol) kan Filipinas asin siya nakaluwas. Pitong taon siyang nsgtukaw bilang Senador, 1928-1935. Kan eleksyon nin 1935, nagkandidato siya, asin nanggana, bilang Representante kan ika-2 distrito kan Camarines Sur. An kargo niyang ini nag'abot sa taon 1941.
Pagsakyada kan Hapon sa Filipinas (1942), nagin siyang miembro sa Asamblea Nasyunal sa irarom kan administrasyon ni Pres. Jose Laurel. Kan 1944, si Laurel pigpatukaw siya bilang Commissioner kan ika-5 Distrito Militar para sa anom na probinsya kan Bicol.
Dai igdi nagtapos an karera niya sa serbisyo publiko ta si Presidente Ramon Magsaysay pignombrahan siyang Ambassador Estraordinary Plenipotentiary para sa Republika kan Indonesya kan Marso 31, 1955.
Masabi pa, siya purong dugong agit-agitan na Nacionalista huli gayod ta saro siya sa kagmukna' kan Partidong ini katuwang ni Pres. Manuel Quezon asin ni Bise-pres. Sergio Osmeña Sr. Poon 1907 abot 1955, siya an presidente kan Partido Nacionalista sa Camarines Sur
Hilnga man
[baguhon | baguhon an source]Mga hihilngan
[baguhon | baguhon an source]- Jose T. Fuentebella: Nationalist and Statesman. Realubit, Maria Lilia F. 2000.
- Retrato sinapi' sa magasin na An Bicolnon. Nob. 1960. p. 9.
Mga panluwas na takod
[baguhon | baguhon an source]- Jose Fuentebella- [1]
- One Hundred Years of Public Service- [2][permanent dead link]
- Jose T. Fuentebella Book- [3]
