Oaphasnwechslstrom

Ois Oaphasnwechslstrom werd unter anderm des bzeichnet, wos normalerweis dahoam aus da Steckdosn kimmt. Es handelt si um an Wechselstrom der iaba zwoa Leiter iabatrong werd. Do se bei am Wechselstrom de Polung ständig umdraht spuids koa Roin, wia rum ma de zwoa Leiter vo na Stromqejn mit Oaphasnwechslstrom oschliaßt.

S' bekannteste Beispui fia an Oaphasnwechslstrom is de Stromversorgung im Haushoid. Do hod da Oaphasnwechslstrom in Eiropa a Effektiv-Spannung vo 230V bei na Frequenz vo 50 Hertz. De Schwingung vo da Spannung is sinusförmig. Oane vo de beidn Leitunga werd im Haushoid geerdet, des nend ma den an Nui-Leiter, wei der gegeniba am Bezugspotential vo da Erdn a Spannung vo Null Void hod. De anda Leitung is dann da Außnleiter. Ois dritte Leitung gibts dann aus Sicherheitsgründ an sognannten Schutzleiter, der genauso wia da Null-Leiter geerdet is. Wei oane vo de easchtn Owendunga vum elektrischn Strom as elektrische Liacht war hoasd da Haushoidstrom heid no in da Umgangssprach Liachtstrom. Des derf aba ned mit da physikalischen-optischn Größ Liachtstrom vawechselt werdn. Recht boid han aba olle meglichn andan Owendunga dazuakemma. Fia gewerbliche Zwecke werd da Oaphasnwechslstrom hauptsächlich fia Beleichtung, Büroeinrichtung und kloane Maschina heagnumma. Fia greaßane Maschina bracht ma an Dreiphasnwechslstrom, dea deszweng umgangsprachlich a Kraftstrom gnennt werd. Oanzlne Leitunga vo am Oaphasnwechslstrom-Netz han iablichaweis nua bis zua 16 Ampere obgsichert. Daduach ergibt se je nach Phasnvaschiabung vom Vabraucher a maximale Leistung vo 3680 Watt de zua Vafügung steht. Deszweng is im Haushoid normalerweis da elektrische Herd in da Kuchl as oanzige Grät, des mit Dreiphasnwechslstrom lafft.

Im deitschsprachign Raum werd d' elektrische Eisnbahn mit na Spannung vo 15.000 Void und na sinusförmign Frequenz vo 16 2/3 Hertz bzw. 16,7 Hertz btriebn. De Oberleitung is de oane Leitung, de Schiana han de zwoate Leitung. In Frankreich fahrns mit 25.000 Void und 50 Hertz, in Italien dageng mit Gleichstrom.

Da Strom fia Haushoid und Gewerbe wead iaba Dreiphasnwechselstrom-Generatoren erzeigt. Bis zua de Häisa werd des a ois Dreiphasnwechslstrom iabatrong. Eascht in de Sicherungskästn werd fia je a Drittl vo de Räum a andane Phasn heagnumma. Da d' Eisnbahn mit na ganz andan Frequenz arbat werd de vo extrige Einphasn-Generatorn beliefert.